Read Alur 2 Lemkei 36 Bible Online

2 Lemkei 36 - Alur bible

2 Lemkei 36

¹Dhanu m’i ng’om gilund gigamu Yehoahaz ma wod Yosia, man gikethe ni ubimo ka won i Yerusalem.

²Yoahaz rundi pare pier ario wi adek kinde m’emaku camu ker; man ecamu ker dwi adek i Yerusalem.

³E ubimo mi Misiri kabe woko i Yerusalem, man ebolo ajok wi ng’om talanto mi mola ma tar dak acel ku talanto mi mola ma kwar acel.

⁴Man ubimo mi Misiri ketho Eliakim m’umin ni ubimo wi Yuda ku Yerusalem, man eloko nyinge doko Yehoiakim. Man Neko gamu Yoahaz m’umin mire, e etere i Misiri.

⁵Yehoiakim rundi pare pier ario wi abic kinde m’emaku camu ker; man ecamu ker rundi apar wi acel i Yerusalem: e etimo gin ma rac i wang’ Yehova Mungu pare.

⁶Nebukadnezar m’ubimo mi Babeli bino i kume, man etwie ku gwang’, kara etere i Babeli.

⁷Nebukadnezar utero agulu mi ot pa Yehova bende i Babeli, man ekethogi i hekalu i Babeli.

⁸Nie dong’ tic pa Yehoiakim, man ginmajudagu pare m’etimo ku gin ma junwang’u i ie, nen, gigore i kitabu mir ubimo mir Israel ku Yuda: e Yehoiakin ma wode camu ker kakare.

⁹Yehoiakin rundi pare abora kinde m’emaku camu ker; man ecamu ker dwi adek ku ceng’ apar i Yerusalem: man etimo gin ma rac i wang’ Yehova.

¹⁰Man ka rundi dwogo ubimo ma Nebukadnezar uoro kwenda, ugame utere Babeli, kud agulu ma ber mi ot pa Yehova, man eketho Zedekia m’umin mire ni ubimo wi Yuda ku Yerusalem.

¹¹Zedekia rundi pare pier ario wi acel kinde m’emaku camu ker; man ecamu ker rundi apar wi acel i Yerusalem:

¹²man etimo gin ma rac i wang’ Yehova Mungu pare; ejwigre gire ngo i wang’ Yeremia ma jabila m’uyero lembe ku dhu Yehova.

¹³Man ejai bende ni ubimo ma Nebukadnezar, m’uketho ekwong’o kwong’ ku Mungu: ento eciko ng’ute, man edwoko adundene nwang’ kum lokre ba Yehova, Mungu mir Israel.

¹⁴Mange ke judongo mi julam ceke, ku dhanu, gidubo dit apila tok ginmajudagu ceke mi thek; man gicido ot pa Yehova m’edwoko leng’ i Yerusalem.

¹⁵Man Yehova, Mungu pa kwaru migi, uoro kwenda pare i bang’gi, m’eai ko pir kugweno, eoro, kum ngisi nege kum dhanu pare, man kum kabedo pare:

¹⁶ento gicayu jukwenda pa Mungu, man gipiemo lembe pare, gitimo co de ni jubila pare, cil ma kwinyo pa Yehova wok ko kum dhanu pare, maram ma kabothne mbe.

¹⁷Ka kumeno ekelo ubimo mi Jukaldayo i wigi, m’unego awobi migi ku palamularu i ot mi kamaleng’ migi, man ngisi pare mbe kum jalawobi kadi nyaku ma sumba, dhanu m’uti kadi ng’atu ma wie ju lwar: emiogi ceke i cinge.

¹⁸Man agulu ceke mi ot pa Mungu, ma dongo ku ma thindho, ku piny m’akana mi ot pa Yehova, man piny m’akana p’ubimo, man mi judongomawijo pare, maeni ceke etero i Babeli.

¹⁹E giwang’u ot pa Mungu, man girwombo gang’kidi mi Yerusalem piny, e giwang’u odkeme ceke ku mac, man ginyotho agulu ma berne ceke.

²⁰Man ju ma giboth ni palamularu eterogi i Babeli; e gibedo ni jutic ire man ni wote cil i camuker mi ker mir Ajemi:

²¹kara uketh lembe pa Yehova utimbre kakare ma ku dhu Yeremia, maram ng’om ubedo ko kud anyong’a ku sabatu pare: kum cil m’ebedo ni uvuru ekwiro sabatu, kara oro pier abiro timbre.

²²Nie i rundi ma kwong’ane pa Kuro m’ubimo mir Ajemi, kara lembe pa Yehova ma ku dhu Yeremia utimbre kakare, Yehova ting’o tipo pa Kuro m’ubimo mir Ajemi, ketho nia etimo lembang’ola i ker pare mba mba, man ekethe i lembagora bende, m’uwacu kumae,

²³Kuro m’ubimo mir Ajemi wacu kumae, Ker ceke m’i ng’om Yehova, Mungu m’i polo, mio ira; man eng’olo ira ya agom ire ot i Yerusalem, ma ni i Yuda. Ng’atu ma tek ni i kindwu mi dhanu pare ceke, Yehova Mungu pare bed kude, man wek eidh malu.