Read Alur 2 Lemkei 5 Bible Online

2 Lemkei 5 - Alur bible

2 Lemkei 5

¹Kum kumeni tic ceke ma Suleman utimo pi ot pa Yehova thum. Man Suleman ukelo gin ma Daudi, ma won uthiero i ie, en e mola ma tar, ku mola ma kwar, kud agulu ceke, man ekethogi i kakanpiny mi ot pa Mungu.

²Suleman ulund ucoko judongo mir Israel, ku wi suru ceke, ma gi judongomawijo mi udi pa wego mi nyithindho mir Israel, i Yerusalem, kara ukel sanduk mi lembariba pa Yehova malu ku i adhura pa Daudi, ma en e Sayuni.

³Man dhanu ceke mir Israel gicokri gigi bang’ ubimo i agba, ma ni i dwi mir abirone.

⁴E judongo ceke mir Israel gibino: man Julawi giting’o sanduk malu;

⁵man gikelo sanduk malu, ku hema mi cokri, kud agulu ceke ma leng’ ma ni i Hema; julam ku Julawi gikelo maeni malu.

⁶Man ubimo ma Suleman kud udul ceke mir Israel, ma gicokri i bang’e, gini i wang’ sanduk, ma gibelamu rombe ku koni dhiang’, ma jucopo kwanu ngo kadi welne de jucopo ng’eyo ngo ni udulne.

⁷E julam gikelo sanduk mi lembariba pa Yehova i ie i kakare, i kayerlembe mi ot, ba kamaleng’ m’usagu, en e the bomb kerubi.

⁸Kum kerubi giyaru bombgi wi ka sanduk, man kerubi giumo sandukne ku yende de ku malu.

⁹Man yen gi bor hai ketho nia dhu yen unen ku ba sanduk i wang’ kayerlembe; ento ginen ungo ku yo woko; e ebedo keca cil i ceng’ ma tin.

¹⁰Gin moko mbe i sanduk ndhu ban ario ma Musa ketho keca i Horeb, kinde ma Yehova timo lembariba ku nyithindho mir Israel, kinde ma giai woko kud i Misiri.

¹¹ Man etimbre, kinde ma julam giwok woko kud i kamaleng’ (kum julam ceke ma ginuti gidwokri gigi leng’, man gikuro kur migi ngo;

¹²Julawi bende ma gi juwer, kagi ceke, cil Asaf man Heman, man Yeduthun, ku wotgi man utumeggi, ma gironjri ku bongu ma nwang’ ma ber, kud umbukulumbu man nanga kud adungu, gicungo ng’et pemblam ma yo nyangu, man julam dak acel ku pier ario ma gibekudho agwara ni karacelo kugi);

¹³etimbre, kinde ma jukudhagwara man juwer gibedo calu acel, kara giketh badwal acel uwinjre kum paku ku foyo Yehova; man kinde ma giting’o dwandgi malu karacelo kud agwara man umbukulumbu ku jambwer mi badwal, man gipaku Yehova, giwacu kumae, Kum en e ber; kum mer mi bero pare bedo mi nja; nia ot ulund upong’ kud afuru, en e ot pa Yehova,

¹⁴ketho nia julam gicopo cungo ngo nitimo kum afurune: kum dwong’ pa Yehova pong’o ot pa Mungu.