Read Alur 2 Lemkei 6 Bible Online

2 Lemkei 6 - Alur bible

2 Lemkei 6

¹Suleman ulund uwacu kumae, Yehova wacu nia ebibedo i mudho ma bii.

²Ento agomo iri ot mi bedo, man ka m’ibed i ie mi nja.

³E ubimo loko wang’e, man emio mugisa ni cokri ceke mir Israel: man cokri ceke mir Israel ucungo.

⁴Man ewacu kumae, Mugisa bed ni Yehova, Mungu mir Israel, m’uyero ku dhoge ni Daudi ma vwa, man etime kakare ku cinge, ewacu kumae,

⁵Ugambre i ceng’ m’awodho ie dhanu para woko kud i ng’om Misiri, agoyo wi adhura moko ngo kud i suru ceke mir Israel ya agom ot i ie, kara nyinga bed keca; kadok ng’atu moko de agoyo wie ngo y a ubed jatelwic mi dhanu para Israel:

⁶ento agoyo wi Yerusalem, kara nyinga bed keca, man agoyo wi Daudi ubed wi dhanu para Israel.

⁷Nie eni i adunde Daudi ma vwa nia egom ot pi nying’ Yehova, Mungu mir Israel.

⁸Ento Yehova wacu ni Daudi ma vwa kumae, Kum eni i adundeni nia igom ot pi nyinga, itimo dre nia eni i adundeni:

⁹ento ibigomo ot ungo; ento wodi ma biai kud ii, e ma bigomo ot pi nyinga.

¹⁰Man Yehova timo lembe pare m’eyero; kum aai kaka Daudi ma vwa, man ajany wi komker mir Israel, calu Yehova ng’olo, man agomo ot pi nying’ Yehova, Mungu mir Israel.

¹¹Man aketho sanduk keca, ma lembariba pa Yehova ni i ie, m’etimo ku nyithindho mir Israel.

¹²Man ecungo i wang’ pemblam pa Yehova i vut cokri ceke mir Israel, man ethang’u cinge

¹³(kum Suleman utimo pem mi mola, kaborne bot abic, kalacne de bot abic, man kadongone bot adek, man ekethe i die lelagang’; e ecungo i wie, man erum wi conge i wang’ cokri ceke mir Israel, man ethang’u cinge yor i polo);

¹⁴man ewacu kumae, E Yehova, Mungu mir Israel, Mungu moko mbe ma calu in, i polo, kadi i ng’om; m’utimo lembariba ku mer mi bero ku jutic peri, m’uwotho i weng’i kud adundegi ceke;

¹⁵m’ugwoko ku jatic peri ma Daudi ma vwa gin m’ing’olo ire: eyo, iyero ku dhogi, man iketho etimbre kakare ku cingi, calu ebedo i ceng’ ma tin.

¹⁶Ka kumeno kawono, E Yehova, Mungu mir Israel, tim ku jatic peri ma Daudi ma vwa gin m’ing’olo ire, m’iwacu kumae, Dhanu birem iri ngo i wang’a ma bijany wi komker mir Israel, tek nyithindho peri giketho wang’gi kum yo migi kende, kara giwoth i cik para calu iwotho i wang’a.

¹⁷Ka kumeno kawono, E Yehova, Mungu mir Israel, wek lembe peri bed andha, m’iyero ni jatic peri ma Daudi.

¹⁸Ento Mungu bibedo karacelo ku dhanu mi ng’om andha? nen, polo ku polo m’i polo copo romi ngo; e ka ot m’agomo ke biromi kani!

¹⁹Ento nen ba rwo pa jatic peri, man ba kwac pare, E Yehova Mungu para, kara iwinj ywak ku rwo ma jatic peri rwo ko i weng’i;

²⁰kara weng’i bed ayaba yo ba ot maeni dieceng’ ku diewor, en e yo ba ka m’iwacu pire nia ibiketho nyingi keca; kara iwinj rwo ma jatic peri birwo yo ba ka maeni.

²¹Man iwinj kwac pa jatic peri, man mi dhanu peri Israel, kinde ma gibirwo yo ba ka maeni: eyo, iwinj i kabedo peri, kud i polo; man kinde m’iwinjo, wek lembene woko.

²²Tek ng’atu moko dubo ni jadhugola pare, man juketho kwong’ i vue uketh ekwong’ kwong’, man ebino ekwong’o kwong’ i wang’ pemblam peri i ot maeni;

²³ilund iwinj kud i polo, man itim, man ipok lembe pa jutic peri, m’icul ko lembe pa jadubo, kara ikel yo pare i wie gire; m’iwek ko lembe pa won bedopwe de, kara imi ire calku bedopwe pare.

²⁴Man tek jugoyo dhanu peri Israel piny i wang’ jadegi, kum gidubo iri, e gilokri kendo gituco nyingi de, man girwo gitimo kwac de i weng’i i ot maeni;

²⁵dong’ ilund iwinj kud i polo, man iwek dubo mi jutic peri Israel woko, man idwokgi kendo i ng’om m’imio igi man ni kwaru migi.

²⁶Kinde ma polo kang’, man koth umbe, kum gidubo iri; tek girwo yo ba ka maeni, man gituco nyingi, man gilokri kum dubo migi, kinde m’imio igi can:

²⁷dong’ ilund iwinj kud i polo, man iwek dubo mi jutic peri woko, man mi dhanu peri Israel, kinde m’iponjogi ku yo ma ber ma maku giwoth i ie; man ior koth wi ng’om peri, m’imio ni dhanu peri ni aba.

²⁸Tek ndru nuti i ng’om, man tek thong’om nuti, tek laimo kadi motho nuti, tek bonyo kadi ukokoyen; tek judegi migi tiekogi kud ali i ng’om mir adhura migi; kadi thong’om ceke kadi tho ceke ma tek nuti;

²⁹rwo kadi kwac ma tek ng’atu moko timo, kadi ma dhanu peri ceke ma Israel utimo, ku ba dhanu ceke ma bing’eyo thong’om pare gire ku can pare gire, man ebithang’u cinge yo ba ot maeni:

³⁰dong’ ilund iwinj kud i polo ma kabedo peri, man iwek lembene woko, man imi ni dhanu kubang’gi kubang’gi ng’atuman calku woth pare ceke, m’ing’eyo adundene (kum in, in i kendi, ing’eyo adunde mi nyithi dhanu);

³¹kara gilwori, ketho giwoth i yo peri, cil ma gibedo ko kwo i ng’om m’imio ni kwaru mwa.

³²Mange ke pi jawirok, ma en e mi dhanu peri Israel ungo, kinde m’ebiai kud i ng’om ma bor ni kum nyingi ma dwong’, ku cingi ma tek, ku boti m’arieya; kinde ma gibibino gibirwo de yo ba ot maeni:

³³dong’ ilund iwinj kud i polo, kud i kabedo peri, man ilund itim calku grin ceke ma jawirok ulwong’i pire; kara kodhidhanu ceke m’i ng’om ung’ei nyingi, man gilwori, calu dhanu peri Israel, man kara ging’ei nia ot maeni m’agomo lwongre ku nyingi.

³⁴Tek dhanu peri cidho yo lwiny kum judegi migi, ku yo ceke ma tek ibiorogi i ie, man girwo i beng’i yo bang’ adhura maeni m’igoyo wie, man yo ba ot m’agomo pi nyingi;

³⁵dong’ ilund iwinj rwo migi ku kwac migi kud i polo, man icung kum lembe migi.

³⁶Tek gidubo iri (kum ng’atu moko mbe ma kudubi), man ng’ecwiny unegi i kumgi, man imiogi ni jadegi, ketho nia giterogi ni ng’eca i ng’om ma bor kadi ma ceng’ni;

³⁷ento tek igi bipido gigi i ng’om ma juterogi i ie ni ng’eca, man gibidwogo kendo, gibitimo kwac i beng’i i ng’om mi ng’eca migi, gibiwacu kumae, Wadubo, watimo kier, man watimo rac:

³⁸tek gidwogo i beng’i kud adundegi ceke man ku ng’eyong’ec migi ceke i ng’om mi ng’eca migi, ka ma giterogi ni ng’eca i ie, man girwo yo ba ng’om migi, m’imio ni kwarugi, man bang’ adhura m’igoyo wie, man yo ba ot m’agomo pi nyingi:

³⁹dong’ ilund iwinj kud i polo, ku i kabedo peri, rwo migi ku kwac migi, man icung kum lembe migi, man iwek lembe mi dhanu peri m’udubo iri woko.

⁴⁰Kawono, E Mungu para, wek, akwei, weng’i bed ayaba, man wek ithi bed acika, ba rwo ma jutimo i ka maeni.

⁴¹Ka kumeno kawono ai, E Yehova Mungu, mond i kayom peri, in, man sanduk mi tego peri: wek julam peri, E Yehova Mungu, ubed aronya ku both, man wek ju ma leng’ peri anyong’a neggi i bero.

⁴²E Yehova Mungu, kud ilok weng’i woko ku ba ju m’iwiro: poi kum mer mi bero peri ma ba Daudi ma jatic peri.