Read Alur 2 Lemkei 7 Bible Online

2 Lemkei 7 - Alur bible

2 Lemkei 7

¹Nie kinde ma Suleman udaru rwo, mac uai i polo loro piny, man ewang’u lam m’awang’a ku lam; e dwong’ pa Yehova pong’o ot.

²Man julam copo mondo ngo i ot pa Yehova, kum dwong’ pa Yehova pong’o ot pa Yehova.

³E nyithindho mir Israel ceke gineno, kinde ma mac uloro piny, man dwong’ pa Yehova ni wi ode; e girum gigi arieba wang’gi i ng’om wi ka m’athora, man girwo, gimio foc de ni Yehova, giwacu kumae, Kum en e ber; kum mer mi bero pare bedo mi nja.

⁴Ubimo ku dhanu ceke gilund githiero lam i wang’ Yehova.

⁵Man ubimo ma Suleman uthiero lam mi koni dhiang’ rubanga pier ario wi ario, man rombe rubanga dak acel ku pier ario. Kum Icumeno ubimo ku dhanu ceke githiero ot pa Mungu.

⁶E julam gicungo, calku tic migi; Julawi bende ku jambwer mi badwal pa Yehova, ma Daudi m’ubimo timo kara umi foc ni Yehova (kum mer mi bero pare bedo mi nja), kinde ma Daudi paku pak ku timotim migi: e julam gikudho agwara i wang’gi; man Israel ceke cungo.

⁷Mange ke Suleman udwoko die lelagang’ ma ni i wang’ot pa Yehova leng’; kum ethiero lam m’awang’a keca, ku mo mi lam mi kwiocwiny, kum pemblam mi mola ma Suleman utimo copo jolo lam m’awang’a, ku lam mi mogo, man mo de ngo.

⁸Kum kumeno Suleman uketho agba bedo nuti i nindo maeca ceng’ abiro, man Israel ceke karacelo kugi, cokri ma dit apila, ugambre kum kamondo mi Hamath cil kum kulo mi Misiri.

⁹Man i ceng’ mir aborane giketho cokri mi rwo: kum giketho thier mi pemblam ubedo ceng’ abiro, man agba de ceng’ abiro.

¹⁰Man i ceng’ pier ario wi adege mi dwi abirone eciko dhanu gidok ba hema migi, ma anyong’a ku mutoro de nego adundegi kum bero ma Yehova nyutho ni Daudi, man ni Suleman man ni Israel ma dhanu pare.

¹¹E Suleman udaru ot pa Yehova kumeni, ku ot p’ubimo: man gin ceke m’uwok i adunde Suleman ya etim i ot pa Yehova, man i ot pare gire, etime m’ebedo ko miero.

¹²E Yehova wok ba Suleman ku diewor, man ewacu ire kumae, Awinjo rwo peri, man agoyo wi ka maeni ira gira ni ot mi lam.

¹³Tek atalo polo kara koth ubed umbe, kadi tek ang’olo nia bonyo ucam ng’om, kadi tek aoro thong’om i kind dhanu para;

¹⁴tek dhanu para, m’ulwongre ku nyinga, bijwigri gigi, man gibirwo, gibiyenyo wang’a de, man gibilokri kud i yo migi mi dubo; abilund winjo kud i polo, man abiweko dubo migi woko, e abicangu ng’om migi.

¹⁵Nie wang’a bibedo ayaba, man itha bibedo acika, ba rwo ma jutimo i ka maeni.

¹⁶Kum kawono agoyo wi ot maeni man adwoke leng’, kara nyinga bed keca mi nja; man wang’a kud adundena bibedo keca thiri thiri.

¹⁷Man pi in, tek ibiwotho i wang’a calu Daudi ma wuru wotho, man ibitimo calku gin ceke m’ang’olo iri, man ibiworo cik para ku lembapoka para;

¹⁸abilund ketho komker mi ker peri ucungi, calu m’atimo ko lembariba ku Daudi ma wuru, m’awacu kumae, Dhanu birem iri ngo ma bibedo ni jabim wi Israel.

¹⁹Ento tek wulokru cen, man wuweko cik para ku lembang’ola para m’aketho i weng’wu, man wubicidho wubitimo ni mungu mange, man wubirwo igi;

²⁰abilund mugogi woko kud ulaggi kud i ng’om para m’amio igi; man ot maeni, m’adwoko leng’ pi nyinga, abibayu woko kud i wang’a, man abidwoke ni lembabola ku koi i kind kodhidhanu ceke.

²¹Man ot maeni, ma wiu kumeno, ku ba dhanu ceke m’ukadhu kud i kume ie biwang’ lii, man ebiwacu kumae, Nedi Yehova timo kumeni kum ng’om maeni, man kum ot maeni?

²²E gibiloko lembe kumae, Kum giweko Yehova, Mungu pa kwaru migi, m’uwodhogi woko kud i ng’om Misiri, man gimoko kum mungu mange, girwo igi de, man gitimo igi: ka kumeno ekelo lem ma rac maeni ceke i wigi.