Read Alur 2 Lemkei 8 Bible Online

2 Lemkei 8 - Alur bible

2 Lemkei 8

¹Man etimbre ka rundi pier ario kadhu, ma Suleman ugomo ie ot pa Yehova, ku ot pare gire,

²nia adhura ma Huram umio ni Suleman, Suleman ugomo gi, man eketho nyithindho mir Israel ubed keca.

³Man Suleman ucidho bang’ Hamathzoba, man evoye.

⁴Man egomo Tadmor i langa, kud adhura ceke mi kakanpiny, m’egomo i Hamath.

⁵Egomo Beth-horon ma malu bende, ku Beth-horon ma piny, adhura ma tek, ku gang’kidi, man dhugang’, kud utwindi;

⁶man Balath, kud adhura ma kakanpiny ceke ma Suleman ubedo ko, kud adhura ceke mi magali pare, man adhura mi weg riuni pare, ku gin ceke ma Suleman uyenyo egom mir anyong’a pare i Yerusalem, man i Lebanon, man i ng’om ceke mi ker pare.

⁷Man pi dhanu ceke ma juweko mi Juhiti, man mi Juamori, man mi Juperizi, man mi Juhivi, man mi Juyebusi, ma gi mir Israel ungo,

⁸mi nyithindho migi m’udong’ yo ng’eigi i ng’om, ma nyithindho mir Israel unyotho ngo, Suleman ujoko dhanu ni ng’eca i kind joni cil i ceng’ ma tin.

⁹Ento mi nyithindho mir Israel Suleman udwokogi ni jutic mi tic pare ngo; ento gin gi dhanu mir ali, judongo mi jego pare, ku jubim mi magali pare man mi weg riuni pare.

¹⁰Man maeni gi jego ma dongo p’ubimo ma Suleman, gi dak ario ku pier abic, m’ubimo wi dhanu.

¹¹Man Suleman ukelo Nyafarao malu kud i adhura pa Daudi ba ot pare m’egomo ire; kum ewacu kumae, Dhaku para bibedo i ot pa Daudi m’ubimo mir Israel ungo, kum en e ka ma leng’, ka ma sanduk pa Yehova bino i ie.

¹²Suleman ulund uthiero lam m’awang’a ni Yehova wi pemblam pa Yehova, m’eguro i wang’ pondot,

¹³calku ma cande nuti ceng’ ku ceng’, m’ethiero calku lembang’ola pa Musa, i ceng’ sabatu, man i dwi m’upor, man i agba ma juketho, wang’ adek i rundi acel, i agba mi kwen ma thobi mbe i ie, man i agba mi yenga, man i agba mi odbak.

¹⁴Man eketho, calku lembapoka pa Daudi ma won, kur mi julam ba tic migi, man Julawi ba tic migi, kara gipak, man gitim i wang’ julam, calu ma cande nuti mi ceng’ ku ceng’; jukur dhugola bende ku ba kur migi ba dhugang’ kubang’gi kubang’gi: kum Daudi ma dhanu pa Mungu ng’olo kumeno.

¹⁵Man giweko lembang’ola p’ubimo ngo ma ba julam ku Julawi pi lembe moko, kadi pi piny m’akana.

¹⁶Nie tic ceke pa Suleman juyiko kum ceng’ mi caku the ot pa Yehova, man cil m’ethum ko. Kum kumeno ot pa Yehova thum.

¹⁷Suleman ulund ucidho Ezion-geber, man bang’ Eloth, dhu nam i ng’om Edom.

¹⁸Man Huram uoro combo i bang’e ku cing’ jutic pare, ku jutic ma weg ng’eyong’ec mi nam; man gibino giku jutic pa Suleman ba Ofir, man gikelo talanto mi mola ma kwar dak ang’wen ku pier abic ku kuca, man gikelogi bang’ ubimo ma Suleman.