Read Alur 2 Lemkei 9 Bible Online

2 Lemkei 9 - Alur bible

2 Lemkei 9

¹Man kinde m’ubimo ma dhaku mi Ceba winjo rwonglembe pa Suleman, ebino kara emul i Suleman ku penji ma tek i Yerusalem, ku piro ma dit apila, man ngamia m’uyeyo yath ma jwa jwa, man mola ma kwar dupa, ku kidi ma pire tek: man kinde m’ebino ba Suleman, giweco gikude pi gin ceke ma ni i adundene.

²Man Suleman uyero ire penji pare ceke; man gin moko mbe m’umungre ni Suleman, ma k’eyero ire ngo.

³Man kinde m’ubimo ma dhaku mi Ceba neno rieko pa Suleman, ku ot m’egomo,

⁴ku cemo mi mesa pare, man bedo mi jutic pare, ku kur mi jutim pare, man kendi migi, man juyei kikombe pare bende, ku kendi migi, man kaidho pare m’eidho ko malu ba ot pa Yehova; tipo moko mbe i ie kendo.

⁵E ewacu ni ubimo kumae. En e rwonglembe andha m’awinjo i ng’om para ma dhe pi tic peri, man pi rieko peri.

⁶Ento ayio lembe migi ngo, ma fodi abino ngo, man wang’a nene; man, nen, ng’et dwong’ mi rieko peri juyero ira ngo: isagu rwonglembe m’awinjo.

⁷Dhanu peri gi jumutoro, man jutic peri maeni gi jumutoro, ma gicungo thiri thiri i weng’i, man giwinjo rieko peri.

⁸Mugisa bed ni Yehova Mungu peri, ma mutoro nege i kumi, kara ekethi wi komker pare, kara ibed ubimo ni Yehova Mungu peri; kum Mungu peri maru Israel, kara eketh ginyang’ mi nja, ka kumeno ekethi ni ubimo i wigi, kara itim pokolembe man bedopwe.

⁹E emio talanto mi mola ma kwar dak acel ku pier ario ni ubimo, ku yath ma jwa jwa dit apila, man kidi ma pire tek: kadi wadi yath ma jwa jwa mbe ma calu m’ubimo ma dhaku mi Ceba mio ni ubimo ma Suleman.

¹⁰Man jutic bende pa Huram, ku jutic pa Suleman, m’ukelo mola ma kwar kud i Ofir, gikelo yendbongu ku kidi ma pire tek.

¹¹Man ubimo timo pondot mi ot pa Yehova ku yendbongune, man mi ot p’ubimo, kud adungu, man nanga ni juwer: man wadi gin maeni fodi juneno ngo i ng’om Yuda.

¹²Man ubimo ma Suleman umio mi ubimo ma dhaku mi Ceba yeny ceke ma ie yenyo, gin ceke m’epenjo, ento maeni ngo m’ekelo bang’ ubimo. Kum kumeno elokre, man edok i ng’om pare gire, en ku jutic pare.

¹³Nie wel jampor mi mola ma kwar ma bino ba Suleman i rundi acel en e talanto mi mola ma kwar dak abusiel ku pier abusiel wi abusiel,

¹⁴umedo maeno ma jukuloka ku weg katali gikelo: man ubimo mir Arabia ceke ku jubim mi ng’om gikelo mola ma kwar ku mola ma tar ba Suleman.

¹⁵E ubimo ma Suleman utimo thungu dak ario mi mola ma kwar m’afoda; cekel mi mola ma kwar m’afoda dak abusiel cidho kum thungu acel.

¹⁶Man etimo ban dak adek mi mola ma kwar m’afoda: cekel mi mola ma kwar dak adek ucidho kum ban acel: man ubimo ketho gi i ot mi luli mi Lebanon.

¹⁷Mange ke ubimo timo komker ma dit mi lakliec, man emwone ku mola ma kwar ma leng’.

¹⁸Man kaidho mi komkerne abusiel, karacelo ku kom mi tielo mi mola ma kwar, ma juribo ku komkerne, man yen ma ni i ng’et kabedo kun ku kun, man umvor ario m’ucungo i ng’et yende.

¹⁹Man umvor apar wi ario cungo keca i ng’ete acel man i ng’ete mucelo wi kaidho abusiel: wadi ma kumeni jutimo ngo i ker moko.

²⁰Man agulu ceke mi medho p’ubimo ma Suleman en e mi mola ma kwar, man agulu ceke mi ot mi luli mi Lebanon en e mi mola ma kwar ma leng’: mola ma tar juparu pire ngo i nindo pa Suleman.

²¹Kum ubimo bedo ku combo ma cidho Tarcic ku jutic pa Huram; wang’ acel i rundi adek combo bino ma ai Tarcic, ma kelo mola ma kwar, ku mola ma tar, ku lakliec, ku wai, ku weli.

²²Kum kumeno ubimo ma Suleman usagu ubimo ceke m’i ng’om ku lonyo man rieko.

²³Man ubimo ceke m’i ng’om giyenyo ka Suleman, kara giwinj rieko pare, ma Mungu ketho i adundene.

²⁴Man gikelo kubang’gi kubang’gi ng’atuman ajok pare, agulu mi mola ma tar, man agulu mi mola ma kwar, ku kendi, man jamtho, ku yath ma jwa jwa, man riuni, ku kana, ma jung’olo ku ba rundi ku ba rundi.

²⁵E Suleman ubedo ku dwol mi riuni ku magali rubanga ang’wen, man weg riuni rubanga apar wi ario, m’eketho i adhura mi magali, man kud ubimo i Yerusalem.

²⁶Man ebimo wi ubimo ceke ugambre Kulo cil kum ng’om mi Jufilisti, man kum kieu mi Misiri.

²⁷Man ubimo ketho mola ma tar ubedo calu kidi i Yerusalem ni ditne, man musonge eketho bedo calu yenduduk ma ni i poga.

²⁸Man gikelo riuni ni Suleman kud i Misiri, man kud i ng’om ceke.

²⁹Nie dong’ tic pa Suleman, ma kwong’ane ku ma cenne, gigore i lemkei pa Nathan ma jabila ngo, man i lembila pa Ahija ma Jaciloni, man i ginmawokiwang’ pa Ido ma jaeulembe pi Yeroboam ma wod Nebati?

³⁰Man Suleman ucamu ker i Yerusalem wi Israel ceke rundi pier ang’wen.

³¹Man Suleman unindo ku kwaru pare, man juyike i adhura pa Daudi ma won: e Rehoboam ma wode camu ker kakare.