Read Alur Ezra 3 Bible Online

Ezra 3 - Alur bible

Ezra 3

¹Man ka dwi mir abirone wok, man nyithindho mir Israel gini i adhura, dhanu cokri karacelo calu ng’atu acel i Yerusalem.

²Yecuwa ma wod Yozadak ulund ucungo malu, ku utumin mire ma julam, man Zerubabel ma wod Cealtiel, man utumin mire, e gigomo pemblam pa Mungu mir Israel, kara gimi lam m’awang’a i wie, calu egore i cik pa Musa ma dhanu pa Mungu.

³Man giketho pemblamne wi there; kum lworo negogi ni dhanu mi ng’ombuno: man gimio lam m’awang’a i wie ni Yehova en e lam m’awang’a mi kugweno kud uthieno.

⁴E gikwiro agba mi odbak, calu egore, man gimio lam m’awang’a ma ceng’ ku ceng’ ku welne, calku lembapoka, calu m’umaku piny ceng’ ku ceng’;

⁵man yo ku ng’eye gimio lam m’awang’a ma thiri thiri, ku lam mi dwi ma por, man mir agba ceke m’aketha pa Yehova ma judwokogi leng’, man mi dhanu ceke kubang’gi kubang’gi m’umio lam mi berocwiny ni Yehova ku laccing’.

⁶Ugambre i ceng’ ma kwong’ane mi dwi mir abirone githeko mio lam m’awang’a ni Yehova: ento the hekalu pa Yehova fodi juguro ngo.

⁷Gimio sente bende ni jutong’kidi, man ni jubodho mi bau; man cemo, ku giramadha, ku mo, ni dhanu mi Sidon, man ni dhanu mi Turo, kara gikel musonge kud i Lebanon giter i nam, ba Yopa, calku lembang’ola ma gigamu ba Kuro m’ubimo mir Ajemi.

⁸Nie i rundi mir arionde mi bino migi ba ot pa Mungu i Yerusalem, i dwi mir arionde, gilund githeko en e Zerubabel ma wod Cealtiel, man Yecuwa ma wod Yozadak, ku dong uturneggi ma julam ku Julawi, man dhanu ceke m’uai i ng’eca ucidho Yerusalem, man giketho Julawi, ma rundi migi tundo pier ario ku m’ukadhu de, kara gibed ni julieu mi tic mi ot pa Yehova.

⁹Yecuwa lund ucungo ku wote man utumin mire, Kadmiel ku wote, ma wot Yuda, karacelo, kara gibed julieu jutic i ot pa Mungu: wot Henadad, ku wotgi man uturneggi ma Julawi.

¹⁰Man ka jugom giguro the hekalu pa Yehova, giketho julam ukendo kendi migi man gibedo kud agwara, man Julawi ma wot Asaf kud umbukulumbu, kara gipak Yehova, calu Daudi m’ubimo mir Israel uketho.

¹¹E giwero wer ng’atuman ni wadi man ni wadi i pakupak man i foyofoc ni Yehova, giwacu kumae, Kum en e ber, kum mer mi bero pare bedo nja yo bang’ Israel. Man dhanune ceke gikok ku kok ma dit, ka gipaku Yehova, kum juguro the ot pa Yehova.

¹²Ento dhanu dupa ma kind julam ku Julawi ku wi udi pa wego, dhanu m’uti m’uneno ot ma kwong’a, ka juguro the ot maeni i wang’gi, giywak ku dwandgi ma dit; man dupa gikok ku dwandgi ma tek ni anyong’a:

¹³ketho nia dhanu copo ng’io ba dwal mi kok mir anyong’a ngo ku ba dwal mi ywak mi dhanu; kum dhanu kok ku dwandgi ma dit, man badwal uwinjre ku bor.