Read Alur Ezra 9 Bible Online

Ezra 9 - Alur bible

Ezra 9

¹Nie ka maeni timbre, judongomawijo eoro ceng’ni an, giwacu kumae, Dhanu mir Israel, ku julam man Julawi, gikoiri gigi ni kodhidhanu m’i ng’om ungo, ma gitimo ko calku ginmajudagu migi, cil mi Jukanani, ku Juhiti, ku Juperizi, ku Juyebusi, ku Juamoni, ku Jumoabi, ku Jumisiri, man Juamori.

²Kum gigamu kind nyiggi pigi gigi man pi wotgi, ketho nia kodhi ma leng’ ujebre ku kodhidhanu m’i ng’ombe: eyo, cing’ judongomawijo ku jubim ular utimo dubo maeni.

³E kan awinjo gin maeni, ayeco kendi para ku kanzu para, man adoyo yukwia ku tika, e abedo piny ma cwinya ng’abre.

⁴Ku ba dhanu ceke ma kumgi miel kum lembe pa Mungu mir Israel, kum dubo mi ju mi ng’eca, gilund gicokri i bang’a; man abedo ma cwinya ng’abre cil kum lam mir uthieno.

⁵Man i kinde mi lam mir uthieno aai malu kud i jwigri para, cil ku kendi para ku kanzu para m’uyec; man apodho wi conga, e athang’u cinga ba Yehova Mungu para;

⁶man awacu kumae, E Mungu para, lewic unega man abedo sirosiro m’ating’ ko wang’a malu i beng’i, Munguna; kum dubo mwa medre i wiwa, man kier mwa dongo malu i polo.

⁷Ugambre i ceng’ pa kwaruwa wabedo i kier m’apila cil i ceng’ maeni; man pi dubo mwa, wan kud ubimo mwa, man julam mwa, jumiowa i cing’ ju m’ubimo mi ng’om, ni palamularu, ni ng’eca, ni ayeki, man ni lewic mi wang’, calu ebedo ceng’ ma tin.

⁸Man kawono pi nindo ma nyanok Yehova Mungu mwa nyutho bero, kara ewek iwa dong’ dhanu m’uboth, man kara emi iwa musumali i ka ma leng’ pare, kara Mungu mwa mi der ni wang’wa, man emi iwa yepocwiny ma nok i kol mwa.

⁹Kum wan wa jukol; ento Mungu mwa kunowa ngo i kol mwa, ento enyutho mer mi bero iwa i wang’ ju m’ubimo mir Ajemi, kara emi iwa yepocwiny, kara eketh ot pa Mungu mwa malu, eyik wang’e m’uyec de, man kara emi iwa gang’kidi i Yuda man i Yerusalem.

¹⁰Man kawono, E Mungu mwa, yo ng’ei maeni wabiwacu ang’o? kum waweko lembang’ola peri,

¹¹m’ing’olo ku jutic peri ma jubila, iwacu kumae, Ng’om, ma wucidho nimwonye, en e ng’om m’ucido ni kum cilo mi kodhidhanu m’i ng’ombuno, ni kum ginmajudagu migi, ma gipong’e ku cilo migi ugambre i there cik i lwithe:

¹²nie ka kumeno kud wumi nyigwu ni wotgi, kadok nyiggi de kud wugam ni wotwu, kadi kud wuyeny kwiocwiny migi kadi mierolembe migi mi nja; kara wubed tek, man wucam gin ma ber m’i ng’ombe, wuweke de ni nyithindhwu ni aba mi nja.

¹³Man yo ng’ei gin ceke m’uwok i wiwa kum tic mwa ma rac, man kum dubo mwa ma dit, kum in i Mungu mwa isendowa nok ka jupore ku gin m’uromo ku dubo mwa, man imio iwa donge ma kumeni,

¹⁴wabituro lembang’ola peri kendo, man wabiribra i gambri ku kodhidhanu m’utimo ginmajudagu maeni? ng’ecwiny binegi i kumwa cil ma ibijigo ko wiwa, kara donge kud udong’, kadi moko kud ubothi?

¹⁵E Yehova, Mungu mir Israel, in i pwe; kum wan wadong’ donge m’uboth, calu ebedo ceng’ maeni: nen, wan wani weng’i i dubo mwa; kum ng’atu moko mbe ma copo cungo i weng’i kum maeni.