Read Alur Nehemia 2 Bible Online

Nehemia 2 - Alur bible

Nehemia 2

¹Man etimbre i dwi Nisan, [2] i rundi pier arionde pa Artacacta m’ubimo, kinde ma pigulok ni i wang’e, nia ating’o pigulokne, man amie ni ubimo. Naka nwang’u fodi can unega ngo i vute.

²Man ubimo wacu ira kumae, Can ni i weng’i nedi, ma kumi ku lith ungo? maeni en e gin mange ngo ndhu can mir adunde. Lworo lund umaka dit.

³Man awacu ni ubimo kumae, Dong’ ubimo bed mi nja: wang’a kubed mi can ungo nedi, kan adhura, ka odliel pa wegwa, udong’ uyung’ni ni uvuru, man dhugang’ne juwang’u ku maci?

⁴Ubimo lund uwacu ira kumae, Girang’o m’ikwayu? Ka kumeno a rwo ba Mungu m’i polo.

⁵Man awacu ni ubimo kumae, Tek ebedo ber ni ubimo, man tek jatic peri nwang’u bero i weng’i, nia ibiora i Yuda, bang’ adhura mi odliel pa wegwa, kara agome.

⁶E ubimo wacu ira kumae, (nwang’u ci ubimo bende bedo i vute), Woth peri bibedo rokani? e ibidwogo awene? Ka kumeno ebedo ber ni ubimo ya eora; man ang’olo ire nindo.

⁷Mange ke awacu ni ubimo kumae, Tek ebedo ber ni ubimo, wek jumi ira waraga ni jubim ma gini loka Kulo, kara giwek akadhi ram atund ko i Yuda;

⁸man waraga ma ni Asaf ma jakur luli p’ubimo, kara emi ira yen m’atim ko riu mi dhugang’ mi ot ma tek ma mi ot, man pi gang’kidi mir adhura, man pi ot m’abimondo i ie. E ubimo mio ira, calku cing’ ma ber pa Mungu para ma ni i wia.

⁹Alund awok ba jubim ma loka Kulo, man amio igi waraga p’ubimo. Nwang’u ubimo oro jego mi njuru asikari ku weg riuni karacelo kuda.

¹⁰E ka Sanbalat ma Jahoroni, man Tobia ma jatic, ma Jaamoni, uwinjo pire, lembene nyayu can i igi apila, kum ng’atu moko bino kara eyeny lembe ubed miero ni nyithondho mir Israel.

¹¹Kum kumeno abino Yerusalem, man abedo keca ceng’ adek.

¹²Man aai ku diewor, waku dhanu moko ma nyanok; kadi ayero ni ng’atu moko de ngo pi gin ma Mungu para ketho i adundena ya atim pi Yerusalem; kadi lim de mbe kuda, ndhu lim m’awotho i wie.

¹³Man awok woko ku diewor ku dhugang’ m’i poga, cil yo ba pi m’atong’a mir utho, man ba dhugang’ mi weyo, man aneno gang’kidi mi Yerusalem, m’urwombre piny, man dhugange m’uwang’ ku mac.

¹⁴Alund acidho kum dhugang’ mi pi ma dhenyini man kum kut p’ubimo: ento kamoko mbe ma lim m’abedo i wie ukadh kud i ie.

¹⁵Alund aidho malu ku diewor i ng’et kulo, man aneno gang’kidi; man adok, e amondo ku dhugang’ m’i poga, man adok kumeno.

¹⁶Man jubim ging’eyo ngo ka m’acidho i ie, kadi gin m’atimo; kadok an de fodi awacu ngo ni Juyahudi, kadok ni julam, kadi ni judongo, kadi ni jubim, kadi ni dong’ dhanu m’utimo tic.

¹⁷Alund awacu igi kumae, Wuneno bedo ma rac ma wani i ie, maram Yerusalem ubedo ko ni uvuru, man dhugang’ne juwang’u ku mac: wubin, wagoyu gang’kidi mi Yerusalem, kara ku wabed ni cac kendo.

¹⁸E ayero igi pi cing’ Mungu para m’ubedo ber i kuma, man ku lembe p’ubimo bende m’eyero ira. Man giwacu kumae, Dong’ waeyu man wagoyue. Ka kumeno gidwoko cing’gi tek pi tic ma ber.

¹⁹Ento ka Sanbalat ma Jahoroni, man Tobia ma jatic, ma Jaemoni, man Gecem ma Jaarabi, giwinjo maeni, ging’ierowa ginyai ko lewic i wiwa, man gicayuwa, giwacu kumae, Girang’o ma wutimo maeni? wubijai ni ubimo?

²⁰Alund aloko lembe igi, man awacu igi kumae, Mungu m’i polo, ebiketho lembe bedo miero iwa; ka kumeno wa jutic pare wa biai man wabigoyo: ento wubedo ku makapiny moko ngo, kadi ng’ol, kadi jampoi, i Yerusalem.