Read Alur Nehemia 4 Bible Online

Nehemia 4 - Alur bible

Nehemia 4

¹Ento etimbre nia, ka Sanbalat uwinjo nia wabegomo gang’kidi, kwinyo make, man ebedo ku thungo ma dit, e ecayu Juyahudi.

²Man eyero i wang’ juwagi ku njuru asikari mi Samaria, e ewacu kumae, Juyahudi maeni ma ng’ic gitimo ang’o? gibidwokri tek gigi? gibilamu lami? gibidaru i ceng’ aceli? gibiketho kidi cer ku i udhuru mi susu, kum juwang’ugi?

³Nwang’u Tobia ma Jaamoni ni i vute, man ewacu kumae, Cil maeno ma gibegoyo, tek kaki idho malu, ebirwombo gang’kidi migi.

⁴Winji, E Mungu mwa; kum jucayuwa: man ilok cac migi dok i wigi gigi, man iwodhgi ni ayeki i ng’om mi ng’eca;

⁵man kud ium kier migi, man kud iwek dubo migi rucre woko i weng’i; kum ginyayu ng’ecwiny i ii i wang’ jugoigang’.

⁶Kum kumeno wagoyo gang’kidine; man gang’kidine ceke rombo m’ewok ko i kore: kum dhanu ketho cwinygi kum timo tic.

⁷Ento etimbre nia, ka Sanbalat, ku Tobia, man Juarabi, ku Juamoni, man Juacdodi, uwinjo nia yiko gang’kidi mi Yerusalem bewotho, man nia ka m’umor umaku cikre, e kwinyo lund umakugi dit;

⁸man gin ceke giribo dhoggi karacelo kara gibin gikied kum Yerusalem, man kara ginyoth tic m’i ie.

⁹Ento wating’o rwo mwa ba Mungu mwa, man waketho kur igi dieceng’ ku diewor, ni kumgi.

¹⁰Man Yuda wacu kumae, Tego mi juyeiter urem, man susu de dit; ketho ya wacopo goyo gang’kidine ngo.

¹¹Man jukwojwa giwacu kumae, Gibing’eyo ngo, kadi anena de ngo, cil ma wamondo ko i kindgi, man wanegogi, e wajig tije.

¹²Man etimbre nia, kinde ma Juyahudi m’ubedo i vutgi gibino, giwacu iwa wang’ apar kud i kaka ceke kumae, Wukowudwog i bang’wa be.

¹³Ka kumeno aketho dhanu ka ma piny ma yo ng’ei gang’kidine, i ka m’udong’ thwolo, aketho dhanu keca calku wat migi ku palamularu migi, man tong’ migi, kud atum migi.

¹⁴E aneno, man aai malu, e awacu ni weg yung’ man ni jubim, man ni dong’ dhanu m’udong’ kumae, Kud wulworgi: wupoi kum Rwoth, m’e dwong’ man jang’oi ndiri de, man wukied pi juwedu, man pi wotwu ku nyigwu, ku mondwu, man pi udi mu.

¹⁵Man etimbre, ka jukwojwa winjo nia lembene ng’eire iwa, man Mungu thiro lembapora migi, nia wadok kawa ceke kum gang’kidine, ku ba dhanu nzu ng’atuman kum tic pare.

¹⁶Man etimbre ugambre i nindo maeca, nia jutic para kucel gitimo i tije, man jukurucel gimaku tong’, ku ban, man atum, ku jabia mi nyunyu; man jubim gini i ng’ei ot ceke pa Yuda.

¹⁷Ju m’ugoyo gang’kidi ku ju m’uyeyo ter giyeiri gigi; ku ba dhanu nzu ng’atuman timo tic ku cinge acel, cinge acel ke emaku ko jamtho pare;

¹⁸man jugoi gang’kidi de kubang’gi kubang’gi nzu ng’atuman utwio palamularu pare i ng’ete, e gigoyo kumeno. E ng’atu m’ukudho agwara eni i vuta.

¹⁹Man ayero ni weg yung, man ni jubim ku dong’ dhanu m’udong’ kumae, Tije e dit, e dwong’, e wakoc tung’ tung’ i gang’kidi, ng’atuman bor ku wadi:

²⁰ka ma tek wubiwinjo ie dwand agwara, wucokru kuca i bang’wa; Mungu mwa bikiedo piwa.

²¹Kum kumeno watimo i tije: man jukucel gimaku tong’ ugambre i rupiny cil ma cero wok ko.

²²Mange ke i nindo maeca awacu ni dhanu kumae, Dong’ dhanu kubang’gi nzu ng’atuman ubed ku jatic pare i Yerusalem, kara gibed ni jukur iwa ku diewor, man gitim tic ku dieceng’.

²³Ka kumeno kadok an, kadi juwada, kadi jutic para, kadi dhanu mi jukur ma gilubo toka, ng’atu moko mbe m’i kindwa m’uwodho kendi mwa woko, ku ba dhanu nzu ng’atuman ucidho i kulo ku jamtho pare.