Read Alur Nehemia 5 Bible Online

Nehemia 5 - Alur bible

Nehemia 5

¹E ywak ma dit ulund umoc ku ba dhanu ku mon migi kum juwagi ma Juyahudi.

²Kum jumoko nuti m’uwacu kumae, Wan, ku wotwa, man nyigwa, wa dupa: dong’ wanweng’u cam, kara wacemu wabed kwo de.

³Jumoko de nuti m’uwacu kumae, Pothi mwa, ku pothi mir ulok mwa, ku udi mwa wabeketho ni mukwatu: dong’ wanweng’u cam, kum ndru maeni.

⁴Jumoko nuti bende m’uwacu kumae, Wagamu banja pir ajok p’ubimo, man waketho pothi mwa ku pothi mwa mir ulok ni mukwatu.

⁵Ento kawono kumwa calu kum juwadwa, man nyithindho mwa calu nyithindho migi: man, nen, wakelo wotwa ku nyigwa i ng’eca kara gibed jutic, man kind nyigwa moko judaru kelogi i ng’eca eca ngi: kadok tego mwa mbe ma wacere ko; kum dhanu mange gibedo ku pothi mwa man pothi mwa mir ulok.

⁶E ng’ecwiny umaka kan awinjo ywak migi ku lembe maeni.

⁷Alund aporo lembe i ia gira, man apiemo ku weg yung ku jubim, e awacu igi kumae, Wugamu kuloka mir azindi, ku ba dhanu nzu ng’atuman ba wadi. Man acoko udul ma dit i kumgi.

⁸E awacu igi kumae, Wan calu wacopo wawaru juwadwa ma Juyahudi, ma julokogi ba thek; man wuyenyo wulok cil juwedu de, e maku julokgi i bang’wa? E gilund giling’, man lem moko mbe ma giloko.

⁹Awacu bende kumae, Gin ma wutimo e ber ungo: maku wuwoth ku lworo Mungu mwa ngo, ni kum cac mi thek ma jukwojwa?

¹⁰E an bende kumeno, juwada man jutic para, wamio igi sente ku cam ni banja. Akwayuwu, dong’! waweku kuloka maeni mir azindi.

¹¹Akwayuwu, wudwok igi, ndhu i ceng’ maeni, pothi migi, man pothi mir ulok migi, ku pothi mir ulam migi, man udi migi man ng’et sente mi dak bende, man mi cam, ku pigulok ma nyen, ku mo, ma wuwodho i bang’gi.

¹²Gilund giwacu kumae, Wabidwokogi, e wabilwong’o gin moko i! bang’gi ngo; wabitimo kumeno, cil calu i iwacu. Alund alwong’o julam, man agamu kwong’ i bang’gi, nia gibitimo calku lembang’ola maeni.

¹³Ayengo bongu para bende, man awacu kumae, Dong’ Mungu yeng dhanu ceke kubang’gi nzu kumeni kud i ot pare, man kud i tic: pare, m’utimo lembang’ola maeni ngo; dong’ juyenge woko kumeni, ie de dong’ nanu. Man cokri ceke giwacu kumae, Amen, man gipaku Yehova. E dhanune gitimo calku lembang’ola maeni.

¹⁴Karacelo ku maeni ugambre i nindo ma juketha ie ni jabim migi i ng’om Yuda, ugambre i rundi mi pier arionde mi bim pa Artacacta m’ubimo, cil kum rundi pier adek wi arionde, en e nindo mi rundi apar wi ario, waku juwadwa wacamu kwen pa jabim ungo.

¹⁵Ento jubim m’utelo yo i wang’a ginuro dhanu, man gigamu kwen ku pigulok i bang’gi, karacelo ku cekel pier ang’wen mi mola ma tar; eyo, cil jutic migi gibimo wi dhanu: ento atimo kumeca ngo, ni kum lworo pa Mungu.

¹⁶Eyo, abedo bende asu i tic mi gang’kidi maeni, kadi wang’iewo ng’om moko de ngo: jutic mwa ceke de gicoko dhoggi kuca ba ticne.

¹⁷Karacelo ku maeni dhanu nuti dhu mesa para, mi Juyahudi ku jubim, dhanu dak acel ku pier abic, m’umedo joni ju m’uai i kind thek m’utiekowa gibino i bang’wa.

¹⁸Nie gin ma juyiko mi ceng’ acel en e koni dhiang’ acel ku rombe abusiel ma beco; gweno bende juyiko ira, man wang’ acel i ceng’ apar jukelo pigulok ceke ma kwonde tung’ tung’: kadok maeni ceke alwong’o kwen pa jabim ungo, kum ng’eca bedo pek wi dhanu maeni.

¹⁹Poi pira, E Mungu para, pi bero, gin ceke m’atimo pi dhanu maeni.