Read Alur Ester 4 Bible Online

Ester 4 - Alur bible

Ester 4

¹Nie ka Mordekai ng’eyo gin ceke m’utimbre, Mordekai yeco kendi pare, man eronyo usuba ku vuru, e ecidho woko i dier adhura, man eywak ku ywak ma dit man mi can;

²e ewok cil wang’ dhugang’ p’ubimo: kum ng’atu moko mbe ma copo mondo dhugang’ p’ubimo tek eronyo usuba.

³Man i ng’etker ceke kubang’e kubang’e, ma tek lembang’ola p’ubimo ku cik pare wok, ywak ma dit bedo nuti i kind Juyahudi, ku kwero cam, man ywak, ku goyo nduru: e dupa vuto i usuba ku vuru.

⁴Man jutic ma nyir pa Ester ku jutic pare gibino giyero maeni ire; e can umaku ci ubimo apila: man eoro kendi kara Mordekai kendi, man kara ekab usuba kud i kume; ento ejole ngo.

⁵Ester ulund ulwong’o Hatak, ma ng’atu acel ma kind jutic p’ubimo, m’eketho kara etim ire, man eng’olo ire ya eci ba Mordekai, kara eng’ei thelembene, man there nedi.

⁶Kum kumeno Hatak ucidho woko ba Mordekai ba ka ma lac mir adhura, ma en e nyim dhugang’ p’ubimo.

⁷Man Mordekai yero ire pi gin ceke m’utimbre ire, ku wel ma cu mi mola ma tar ma Haman ung’olo y a ebiketho i kakanpiny p’ubimo pi Juyahudi, kara junyothgi.

⁸Emio ire waraga mi lembagora mi cik de ma jumio i Cucan kara junyothgi, ya enyuth ni Ester, man kara eyere ire, man ning’olo ire nia maku ecidh bang’ ubimo, kara ekwaye, man epenje, pi juthugi.

⁹E Hatak ubino man eyero ni Ester lembe pa Mordekai.

¹⁰Ester ulund uyero ni Hatak, man emio ire lembe ni Mordekai, ewacu kumae:

¹¹Jutic p’ubimo ceke, man dhanu mi ng’etker p’ubimo, ging’eyo, nia ng’atu moko, kadok en e nico kadi dhaku, ma tek ebimondo bang’ ubimo i lelagang’ ma yor i ie, ma jukulwong’e alwong’a ngo, cik acel nuti ire, nia junege, tek ubimo kuting’o uluth mi ker mi mola ma kwar ungo, kara ebed kwo: ento an julwong’a ngo ya amond bang’ ubimo ceng’ pier adek maeni.

¹²Man giyero lembe pa Ester ni Mordekai.

¹³Mordekai lund uwacu igi ya gidwok lembe ni Ester kumae, Ii kud upid i kumi giri nia ibiboth i ot p’ubimo, ma sagu Juyahudi wedu mange ceke.

¹⁴Kum tek ibedo ling’ asu i nindo maeni, kony ku both bilund wok ni Juyahudi ku yo ku mange, ento in ku ot pa wuru binyothre: man ng’a m’ung’eyo tek iwok i ker pi wagi nindo ma kumeni?

¹⁵E Ester ulund uwacu igi ya gidwok lembe ni Mordekai kumae,

¹⁶Cidhi, icok Juyahudi ceke ma ginuti i Cucan, man wuwek cam pira, man kud wucam kadok amadha de i nindo mi ceng’ adek, diewor kadi dieceng’: an bende ku jutic para ma nyir wabiweko cam kumeno; e kumeno abimondo bang’ ubimo, ma en e calku cik ungo: man tek arwinyo, de arwiny.

¹⁷Ka kumeno Mordekai cidho, man etimo calku gin ceke ma Ester ung’olo.