Read Alur Ester 5 Bible Online

Ester 5 - Alur bible

Ester 5

¹Nie etimbre i ceng’ mir adege, nia Ester ukendo bongu pare mi ker, man ecungo i lelagang’ ma yor i ot p’ubimo, yo kum ot p’ubimo: man ubimo jany wi komker i ot mi ker, yo kum kamondo mi ot.

²Man etimbre, kan ubimo neno Ester ma cege be Cungo i lelagang’, nia enwang’u bero i wang’e; man ubimo ting’o uluth mi ker mi mola ma kwar ma ni i cinge malu ni Ester. Ka kumeno Ester ucoro ceng’ni, man emulo dhu uluth mi ker.

³Ubimo lund uwacu ire kumae, Iyenyo ang’o, Ester ma ci ubimo? man gindang’o m’ikwayu? ebimire iri kadok cil ng’etker.

⁴Man Ester uwacu kumae, Tek ebedo ber ni ubimo, wek ubimo ku Haman gibin tin ba cemo m’ayiko ire.

⁵Ubimo lund uwacu kumae, Wuketh Haman utim pio, kara etimbre calu Ester uwacu. Ka kumeno ubimo ku Haman gibino ba cemo ma Ester uyiko.

⁶E ubimo wacu ni Ester dhu cemo mi pigulok kumae, Gindang’o m’ikwayu? man ebimire iri: man penji peri en e ang’o? ebitimbre kadok en e ng’etker ngi.

⁷Ester ulund uloko lembe man ewacu kumae, Girakwaya para man penji para e eni:

⁸Tek anwang’u bero i wang’ ubimo, man tek ebedo ber ni ubimo ya emi gin m’akwayu, man etim gin m’apenjo, dong’ ubimo ku Haman de gibin ba cemo m’abiyiko igi, man abitimo urwo calu ubimo wacu.

⁹Haman ulund uwok woko i ceng’ maeno ma anyong’a ku mutoro nego adundene dit: ento ka Haman uneno Mordekai dhugang’ p’ubimo, nia eai malu ngo kadok acora de ecoro cen ungo ire, nia kwinyo nege kum Mordekai.

¹⁰Ento Haman utwio cwinye gire, man edok i pacu pare; e eoro julwong’ jurimbe gibin man Zerec ma cege.

¹¹Man Haman ukoro igi pi dwong’ mi lonyo pare, man pir udul mi nyithindho pare, man pi gin ceke m’ubimo dode ko, man maram eyunge ko ma sagu judongomawijo ku jutic p’ubimo.

¹²Mange ke Haman uwacu kumae, Eyo, Ester ma ci ubimo uyio ng’atu moko ngo umond karacelo kud ubimo ba cemo eyio ndhu an a kenda; urwo bende elwong’owa wakud ubimo.

¹³Ento maeni ceke kulokane mbe ira, cil m’acikuneno Mordekai ma Jayahudi m’ubedo dhugang’ p’ubimo.

¹⁴Zerec ma cege lund uwacu ire ku jurimbe ceke de kumae, Dong’ jugur yen ma bot pier abic, man kugweno iyer ni ubimo nia judei Mordekai i wie: kan ibilund mondo ku mutoro wukud ubimo ba cemo. E lembene maku i Haman; man eketho jugur yende.