Read Alur Ai 2 Bible Online

Ai 2 - Alur bible

Ai 2

¹Man ng’atu acel m’i ot pa Lawi cidho, man egamu dhaku ma nya Lawi.

²E dhakune gamu ie, man enyolo nyathin ma nico: e kan enene nia en e nyathin ma ber, ekane dwi adek.

³Man kan ecopo kane kendo ngo, egamu yei mi mutabi ire, man efuye kud ulobo man kud udok; e eketho nyathin i ie, man ekethe i usi dhu kulo.

⁴Man nyamin ucungo ku cen, kara eng’ei gin ma bitimbre i kume.

⁵Man nya Farao loro piny kara ejom i kulo; man nyir pare giwotho dhu kulo; e eneno yei i kind usi, man eoro bong’ pare game.

⁶Man eyabe, e eneno nyathin: man, nen, nyathinne ywak. E ngisi nege i kume, man ewacu kumae, Maeni en e nyathin moko mi Juebrania.

⁷Nyamin ulund uwacu ni nya Farao kumae, Iyenyo acidh alwong’ japidi iri i kind mon mi Juebrania, kara epid nyathinne iri?

⁸E nya Farao wacu ire kumae, Cidhi. E nyakune cidho man elwong’o min nyathinne.

⁹Man nya Farao wacu ire kumae, Ting’ nyathin maeni, man ipide ira, e abimio iri sukuliane. E dhakune ting’o nyathinne, man epide.

¹⁰Man nyathinne dongo, e ekele ba nya Farao, man edoko wode. Man elwong’o nyinge Musa, ewacu de kumae, Kum awodhe woko kud i pi.

¹¹ Man etimbre i ceng’ maeca, kinde ma Musa dongo, nia ewok woko ba utumin, man eneno ter migi: e eneno Jamisiri befodo Jaebrania, ma ng’atu acel ma kind utumin.

¹²Man eneno kun ku kun, e kan eneno nia ng’atu moko mbe, e enego Jamisiri, man eyike i kwio.

¹³E ewok woko i ceng’ mir arionde, man, nen, Juebrania ario gibenyegri: man ewacu ni ng’atu m’ubetimo wadi rac kumae, Nedi igoyo wedu?

¹⁴Man ewacu kumae, Ng’a m’ukethi ni jaditmawijo man japoklembe i wiwa? iyenyo inega calu inego Jamisiri? Man lworo nego Musa, man ewacu kumae, Andha lembe maeni ng’eire.

¹⁵Nie ka Farao winjo lembe maeni, eyenyo eneg Musa. Ento Musa ringo kud i wang’ Farao, man ebedo i ng’om Midian: e ebedo piny dhu kulo m’atong’a.

¹⁶Nwang’u jalam mi Midian ubedo ku nyige abiro: man gibino nitwomo pi, man gipong’o wer kara udul rombe pa weggi madhi.

¹⁷E jukwac gibino giriemogi cen; ento Musa cungo man ekonyogi, man eketho udul rombe migi madhu pi.

¹⁸Man ka gibino ba Reuel ma weggi, ewacu kumae, Tin wudwogo con nedi?

¹⁹E giwacu kumae, Jamisiri bodhowa kud i cing’ jukwac, mange ke etwomo pi iwa, man eketho udul rombe gimadhu.

²⁰Man ewacu ni nyige kumae, Eni kani? nedi wuweko ng’atuca? wulwong’e, kara ecam cemo.

²¹E Musa yio ebed ku ng’atuca: man emio Zipora ma nyare ni Musa.

²²Man enyolo nyathin ma nico, e elwong’o nyinge Gercom; kum ewacu kumae, Abedo ni umondo i ng’om mi juwirok.

²³Man etimbre yo ng’ei nindo maeno dupa, nia ubimo mi Misiri tho: e nyithindho mir Israel gigamu cwinygi kum ng’eca, man giywak, man ywak migi idho malu ba Mungu ni kum ng’ecane.

²⁴E Mungu winjo cur migi, man Mungu poi kum lembariba pare ma giribo gikud Ibrahim, man kud Isak, man ku Yakobo.

²⁵E Mungu neno nyithindho mir Israel, man Mungu ng’eyogi.