Read Alur Ai 22 Bible Online

Ai 22 - Alur bible

Ai 22

¹Tek ng’atu moko bikwalu koni dhiang’, kadi rombo, man enege, kadi eloke; ebiculo dhiang’ abic pi dhiange, kadi rombe ang’wen pi rombo.

²Tek jurubo jakwo m’ebemoro piny, man jugoye ketho etho, e culo rimo bibedo umbe pire.

³Tek piny uru i wie, e culo rimo bibedo nuti pire; ebiculo: tek ebedo ku gin moko ngo, jubilund loke pi kwo pare.

⁴Tek jurubo jamb kwo i cinge ma kwo, tek en e koni dhiang’, kadi kana, kadi rombo; ebiculo wang’ ario.

⁵Tek ng’atu moko ketho podho kadi podho mir ulok nia lim ucam, man ebiweko lim pare bedo agonya, man ecamu i podho pa ng’atu mange; ebiculo ng’et gin ma ber m’i podho pare, man m’i podho mir ulok pare gire.

⁶Tek mac uliel, man emaku ukudho, ketho nia kumna cam, kadi cam ma wi tiende, kadi podho wang’; ng’atu m’ucwinyo maje biculo andha.

⁷Tek ng’atu moko mio sente kadi piny ba wadi kara egwoke, man jukwale kud i ot pa ng’atuno; tek junwang’u jakwo, ebiculo wang’ ario.

⁸Tek junwang’u jakwo ngo, e won ot bibino ceng’ni ba Mungu, kara unen tek eketho cinge ngo kum piny pa wadi.

⁹Kum ku ba lembe ceke mi kier, tek en e mi koni dhiang’ kadi mi kana, kadi mi rombo, mi kendi, kadi mi gin moko m’urwinyo ma kwonde tung’ tung’ ma ng’atu moko wacu pire kumae, Maeni en e en, lembe mi juario bibino i wang’ Mungu; ng’atu ma Mungu bigonje biculo wang’ ario ni wadi.

¹⁰Tek ng’atu moko mio kana, kadi koni dhiang’, kadi rombo, kadi lim moko ni wadi kara egwoke; man etho, kadi abala wok i kume, kadi jurieme woko, ma ng’atu moko mbe m’unene:

¹¹kwong’ pa Yehova bibedo i kindgi gin ario, tek eketho cinge ngo kum piny pa wadi; e won bijolo maeni, man ebiculo ngo.

¹²Ento tek jukwale kud i bang’e, ebiculo ni won.

¹³Tek juyece nziki nziki, wek ekele ni mulembe; ebiculo pi maeno ma juyeco ngo.

¹⁴Man tek ng’atu moko gamu piny pa wadi, man enwang’u abala, kadi etho, ma won pinje mbe i bang’e, ebiculo andha.

¹⁵Tek won ni i bang’e, ebiculo ngo: tek en e piny mi sukulia, ebino pi sukulia pare.

¹⁶Man tek ng’ atu moko bibidho nyaku ma sumba ma junyomo ngo, man evuto kude, ebimio keny pire andha kara edok dhaku pare.

¹⁷Tek won ukwero mie ire ma gwei, ebiculo sente calku keny mi nyir.

¹⁸Kud iwek dhaku m’ajoga bed kwo.

¹⁹Ng’atu ma tek uvuto ku lim jubinege andha.

²⁰Ng’atu m’umio lam ni mungu moko, ma ku ni Mungu kende ngo, jubinyothe ma gwei.

²¹Man kud itim umondo rac, kadi kud isende: kum wukowubedo umondo i ng’om Misiri.

²²Kud wusend dhaku moko ma cware tho, kadi nyathin ma kic.

²³Tek isendogi i lembe moko, man giywak i bang’a pi lembe moko, abiwinjo ywak migi andha;

²⁴e kwinyo para biopo, man abinegowu ku palamularu; e mon mu bibedo mon ma coggi tho, man nyithindho mu de kic.

²⁵Tek imio sente moko ni banja ni dhanu para moko ma ni karacelo kudi ma en e jacan, kud ibed ire calu jarabanja; kadi kud imed kuloka i wie.

²⁶Tek igamu kendi pa wedu ni mukwatu, ibidwoke i bang’e ma fodi ceng’ kupodho ngo:

²⁷kum maeno en e jambum pare e kende, en e kendi pare mi dendkume: ebinindo i ang’o? man ebitimbre, kinde m’eywak i bang’a, nia abiwinjo; kum an a won bero.

²⁸Kud icid Mungu, kadi kud ilam jabim mi juthu.

²⁹Kud igal ku mio kum nyai mi mwoka peri, man kum ulok peri m’udhir. Mi wodi ma kayu ira.

³⁰Tim kumeno kum koni dhiang’ peri, man kum rombe peri: ebibedo ceng’ abiro ku min; i ceng’ mir aborane ibimie ira.

³¹Wubed ira ni dhanu ma leng’: ka kumeno kud wucam ring’o moko ma yedi m’i thim uyeco: wubaye ni gwogi.