Read Alur Ai 25 Bible Online

Ai 25 - Alur bible

Ai 25

¹Man Yehova yero ni Musa, ewacu kumae,

²Yer ni nyithindho mir Israel, nia gigam ira girathiera: wugam girathiera para ba dhanu kubang’gi kubang’gi ma adundene ketho eyio mio.

³Man maeni en e girathiera ma wugam i bang’gi: mola ma kwar, ku mola ma tar, man mola,

⁴man gin ma ayine ulweku, man uluga, man gin ma kwar ngbo, ku bongu ma nwang’ ma ber, ku yuk diegi,

⁵man lau nyogi diegi ma jukworo, man lau yedi m’i nam, ku yendulu,

⁶man mo mi thala, ku yath ma jwa jwa ma mi mo m’awira, man mir udok ma ng’wice ng’ar,

⁷man kidi ma col calu nam, ku kidi m’amwona, pir ugoke, man pi jambkor.

⁸Man wek gitim ira kamaleng’, kara abed i kindgi.

⁹Calku gin ceke m’anyutho iri, ayi hema, man ayi jambe ceke, e wubitime kumeca.

¹⁰Man gibitimo sanduk mi yendulu: kaborne bot ario ku katumbla, kalacne bot acel ku katumbla, man kadongone bot acel ku katumbla.

¹¹Man imwone ku mola ma kwar ma leng’, imwone yor i ie ku yo woko, man itim ruko mi mola ma kwar i wie utieke gbur.

¹²Man ithiedh wende ang’wen mi mola ma kwar pire, man ikethgi i tiende ang’wenne; wende ario bibedo i ng’ete kurucel, man wende ario i ng’ete mucelo.

¹³Man itim yen ma bor mi yendulu, man imwongi ku mola ma kwar.

¹⁴Man iroi yende i wend sanduk i ng’ete, ma juyei ko sandukne.

¹⁵E yende bibedo i wend sanduk: jubikabugi woko kud i kume ngo.

¹⁶Man iketh lembatuca m’abimio iri i sandukne.

¹⁷Man itim kabedomikisa ku mola ma kwar ma leng’: kaborne bibedo bot ario ku katumbla, man kalacne bot acel ku katumbla.

¹⁸Man itim kerubi ario ku mola ma kwar; itimgi ku tic mi girafoda, i kajik ario mi kabedomikisa.

¹⁹Man itim kerubi acel i kajik acel, man kerubi acel i kajik mucelo: tim kerubi mi piny acel karacelo ku kabedomikisa i kajikne ario.

²⁰Man kerubi birieyo bombgi malu, ma gium ko kabedomikisa ku bombgi, ku wang’gi ma acel ni yo ba wadi acel ni yo ba wadi; ma wang’ kerubi ni yo ba kabedomikisa.

²¹Man iketh kabedomikisa malu wi sanduk; man iketh lembatuca m’abimio iri i sanduk.

²²E wabirombo wakudi keca, man wabiweco wakudi ku malu wi kabedomikisa, kud i kind kerubi ario ma gini wi sanduk mi lembatuca, pi gin ceke m’abimio iri i lembang’ola ni nyithindho mir Israel.

²³Man itim mesa mi yendulu: kaborne bibedo bot ario, kalacne bibedo bot acel, man kadongone bibedo bot acel ku katumbla.

²⁴Man imwone ku mola ma kwar ma leng’, man itim ruko mi mola ma kwar utieke gbur.

²⁵Man itim jamgwokne utieke gbur ro ku laccing’; man itim ruko mi mola ma kwar mi jamgwokne utieke gbur.

²⁶Man itim ire wende ang’wen mi mola ma kwar, man iketh wende wi tunge ang’wen ma ni wi tiende ang’wen.

²⁷Wende bibedo ceng’ni jamgwokne, i ka mi yen ma juyeyo ko mesa.

²⁸Man itim yen ku yendulu, man imwongi ku mola ma kwar, kara juyei mesa kugi.

²⁹Man itim jamnine, kud upalne, kud amorpine, man tabune, ma jukonjo kudo: itimgi ku mola ma kwar ma leng’.

³⁰Man iketh kwen m’anyutha i wang’a wi mesa thiri thiri.

³¹Man itim thethala ku mola ma kwar ma leng’: jutim thethala ku tic mi girafoda, en e there, kud uludhe; weme, ku tiendedhok mi kume, man thiwe, bibedo mi piny acel karacelo kude:

³²man jange abusiel m’uai i ng’ete bibedo nuti; jange adek mi thethala kud i ng’ete acel, man jange adek mi thethala kud i ng’ete mucelo:

³³tabu adek ma jutimo calu thiu akpalakpala i jange acel, tiendedhok ku thiwe; man tabu adek ma jutimo calu thiulam ni i kum jange mucelo, tiendedhok man thiwe: e mi jange abusiel m’uai i thethala de kumeca:

³⁴man i thethala tabu ang’wen ma jutimo calu thiulam, tiendedhokne, man thiwe;

³⁵man tiendedhok ni the jange ario mi piny acel karacelo kude, man tiendedhok ni the jange ario mi piny acel karacelo kude, man tiendedhok ni the jange ario mi piny acel karacelo kude, mi jange abusiel m’uai i thethala.

³⁶Tiendedhok ku jange bibedo mi piny acel karacelo kude; man en kubang’e dho en e tic mi girafoda mi mola ma kwar ma leng’.

³⁷Man itim thalane abiro: man gibicwinyo thalane, kara umi der i kume.

³⁸Man makasine, ku tabu mi makasine, bibedo mi mola ma kwar ma leng’.

³⁹Jubitime ku talanto acel mi mola ma kwar ma leng’, kud agulu maeni ceke.

⁴⁰Man inen nia itimgi calu ayigi, m’unyuthre iri wi got.