Read Alur Ai 26 Bible Online

Ai 26 - Alur bible

Ai 26

¹Man ke itim hema ku kusikabongu apar; itimgi ku thondh bongu ma nwang’ m’awia, man m’ulweku, man m’uluga, man ma kwar ngbo, ku kerubi ma tic pa jabodho ma riek.

²Kabor mi kusikabongu kubang’e kubang’e bibedo bot pier ario wi abora, man kalac mi kusikabongu kubang’e kubang’e bot ang’wen: kusikabongu ceke bibedo ku jambpor acel.

³Kusikabongu abic jubiribo karacelo man kum wadi man kum wadi; man kusikabongu abic kurucel jubiribo karacelo man kum wadi man kum wadi.

⁴Man itim ukol m’ulweku wi ng’et kusikabongu acel ku ba dhoge i twicne; man itim kumeca i ng’et kusikabongu ma ni yo woko i twic mir arionde.

⁵Itim ukol pier abic kum kusikabongu acel, man itim ukol pier abic kum ng’et kusikabongu ma ni i twic mir arionde; ukolne bipore ku wadi.

⁶Man itim ramak pier abic mi mola ma kwar, man irib kusikabongu man kum wadi ku ramakne: e hema bidoko ni acel.

⁷Man itim kusikabongu ku yuk diegi ni hema ma wi hema: itimgi ni kusikabongu apar wi acel.

⁸Kabor mi kusikabongu kubang’e kubang’e ubed bot pier adek, man kalac mi kusikabongu kubang’e kubang’e ubed bot ang’wen: kusikabongu apar wi acel ubed mi jambpor acel.

⁹Man irib kusikabongu abic kakendgi, man kusikabongu abusiel kakendgi, man idol kusikabongu mir abusiende i wang’ hema.

¹⁰Man itim ukol pier abic kum ng’et kusikabongu ma yo woko i katwicne, man ukol pier abic kum ng’et kusikabongu ma ni yo woko i katwic mir arionde.

¹¹Man itim ramak mi mola pier abic, man iketh ramak i ukolne, man irib hema karacelo, kara ebed acel.

¹²Man ng’ete m’udong’ m’uoi mi kusikabongu mi hema, ng’et kusikabongu m’udong’, bioi yo ng’ei hema.

¹³Man bot acel i ng’ete kucel, man bot acel i ng’ete mucelo, mi kabor mi kusikabongu mi hema m’udong’, bioi i ng’et hema yo kun ku kun, kara uume.

¹⁴Man itim jambum mi hema ku lau nyogi rombe ma jukworo, man jambum mi lau yedi m’i nam i wie.

¹⁵Man itim bau mi hema ku yendulu, m’ucungo atira.

¹⁶Bau acel kaborne bibedo bot apar, man kalac mi bau kubang’e kubang’e bibedo bot acel ku katumbla.

¹⁷Ku ba bau ceke bibedo ku karibne ario m’uribe man ku wadi: tim kumeni kum bau ceke mi hema.

¹⁸Man itim bau mi hema, bau pier ario mi ng’ete ma yor ariwa ma piny.

¹⁹Man itim wer mi mola ma tar pier ang’wen the bau pier ario; wer ario the bau acel mi jamb ribne ario, man wer ario the bau mange mi jamb ribne ario:

²⁰man mi ng’et hema mir arionde, ng’ete ma yor ariwa ma malu, bau pier ario,

²¹ku werne pier ang’wen mi mola ma tar; wer ario the bau acel, man wer ario the bau mucelo.

²²Man itim bau abusiel mi ng’et hema ma yor i ng’eye yo reto.

²³Man itim bau ario mi gund hema ma yor i ng’eye.

²⁴Gibibedo ario ario yor i there, gibiribri karacelo kumeni cil i wie ba wende acel: ario de bibedo kumeni; gibibedo mi gunde ario.

²⁵Man bau abora bibedo nuti, ku werne mi mola ma tar, wer apar wi abusiel; wer ario the bau acel, man wer ario the bau mange.

²⁶Man itim utwindi ku yendulu; abic mi bau m’i ng’et hema kucel,

²⁷man utwindi abic mi bau m’i ng’et hema mucelo, man utwindi abic mi bau m’i ng’et hema, ma yor i ng’eye yo reto.

²⁸Man utwindi m’i diere ma ni i kind bau bikadhu wi tunge kun ku kun.

²⁹Man imwon bau ku mola ma kwar, man itim wendene mi mola ma kwar kar utwindi: man imwon utwindine ku mola ma kwar.

³⁰Man iting’ hema malu calkud ayine m’unyuthre iri wi got.

³¹Man itim kusikabongu mi gin m’ulweku, man uluga, ku ma kwar ngbo, man bongu ma nwang’ ma ber m’awia: jubitime ku kerubi ma tic pa jabodho ma riek:

³²man ing’abe kura mbegi ang’wen mi yendulu ma jumwono ku mola ma kwar; golne bibedo mi mola ma kwar, wi wer ang’wen mi mola ma tar.

³³Man ing’ab kusikabongu the ramak, man ikel sanduk mi lembatuca kuca yor i kusikabongu: man kusikabongune bipoko iri kind kamaleng’ ku kamaleng’ m’usagu.

³⁴Man iketh kabedomikisa wi sanduk mi lembatuca i kamaleng’ m’usagu.

³⁵Man iketh mesa yo ng’ei kusikabongu, man thethala i wang’ mesa i ng’et hema ma yor ariwa ma piny: man iketh mesane i ng’ete ma yor ariwa ma malu.

³⁶Man itim voi mi dhugola mi Hema, mi gin m’ulweku, ku m’uluga, man ma kwar ngbo, man bongu ma nwang’ ma ber m’awia, ma mi tic pa jabodho mi kwoc mi ruko.

³⁷Man itim mbegi abic mi yendulu ni voine, man imwongi ku mola ma kwar; golne bibedo mi mola ma kwar: man ithiedh igi wer abic mi mola.