Read Alur Ai 29 Bible Online

Ai 29 - Alur bible

Ai 29

¹Man maeni en e gin m’ibitimo igi kara idwokgi leng’, mi timotim ira i tic ma pa jalam: gam nyathi thwon acel man nyogi rombe ario ma mulima mbe i kumgi,

²man kwen ma thobi mbe i ie, man kwen m’ang’ina m’ujebre ku mo, ku kwen m’apada ma thobi mbe i ie ma juwiro ku mo: itimgi ku mogo ma yom mi nganu.

³Man ikethgi i katoko acel, man ikelgi i katoko, karacelo ku thwon man nyogi rombe ario.

⁴Man ikel Harun ku wote ba dhugola mi hema mi cokri, man ijomgi ku pi.

⁵Man igam kendi, irony Harun de ku kanzu, man kanzu mir ugoke, man ugoke, ku jambkor, man itwie ku jambtwic mir ugoke ma jucwio ku rieko;

⁶man iketh jambwic i wie, man iketh jamkermiwic ma leng’ wi jambwic.

⁷Ilund igam mo mir awira, man ikonje i wie, man iwire.

⁸Man ikel wote, irony gi de ku kanzu.

⁹Man itwi thondhpier i kumgi, en e Harun ku wote, man itwi jambwic i wigi: man tic mi lamulam bibedo migi ku cik mi nja: man ithier Harun ku wote.

¹⁰Man ikel thwon dhiang’ i wang, hema mi cokri: man Harun ku wote biketho cing’gi wi thwondhe.

¹¹Man ineg thwondhe i wang’ Yehova ba dhugola mi hema mi cokri.

¹²Man igam kum rimb thwondhe, man ikethe wi tung pemblam ku lweti; man ikonj rimo ceke the pemblam.

¹³Man igam mio ceke m’uumo cindie, ku bor ma wi cwiny, man nying’ rong’ni ario, ku mio ma ni i kumgi, man iwang’gi wi pemblam.

¹⁴Ento ring’ thwon, ku lawe, ku weine, iwang’ ku mac yo woko ni kagonjo: en e lam mi dubo.

¹⁵Igam nyog rombo bende; man Harun ku wote gibiketho cing’gi die wi nyog rombone.

¹⁶Man ithum nyog rombone, man igam rimone, man ikire ng’et pemblam gbur.

¹⁷Man ithum nyog rombone i wathne i wathne, man iiwok cindie, ku tiende, man ikethgi karacelo ku wadhe, man karacelo ku wie.

¹⁸Man iwang’ nyog rombone dho wi pemblam: en e lam m’awang’a ni Yehova; en e ng’wic piny ma ng’wi ng’ar, lam ma jutimo ku mac ni Yehova.

¹⁹Man igam nyog rombo mucelo, man Harun giku wote giketh cing’gi wi nyog rombone.

²⁰Ilund ithum nyog rombone, man igam kum rimone, man ikethe wi landu ith Harun ma yor acwic, man wi landu ith wote ma yor acwic, man wi dwong’ cinge ma yor acwic, man wi dwong’ tiende ma yor acwic, man ikir rimone i ng’et pemblam gbur.

²¹Man igam kum rimo ma ni wi pemblam, man kum mo m’awira, man ikire wi Harun, man wi kendi pare, man wi wote, man wi kendi mi wote karacelo kude: e ebidoko leng’, ku kendi pare, man wote, ku kendi mi wote karacelo kude.

²²Man igam kum mio pa nyog rombone bende, ku yibe ma mio, ku mio m’uumo cindie, man bor ma wi cwiny, ku nying rong’ni ario, man mio ma ni i wigi, ku bam ma yor acwic (kum en e nyog rombo mi thier),

²³ku kwen m’ang’ina acel, man kwen m’ang’ina acel ma ku mo, man kwen m’apada acel, ku i katoko mi kwen ma thobi mbe i ie ma ni i wang’ Yehova:

²⁴man iketh ceke i cing’ Harun, man i cing’ wote, man iwirgi ni lam m’awira i wang’ Yehova.

²⁵Man igamgi kud i cing’gi, man iwang’gi wi pemblam wi lam m’awang’a, ni ng’wic gin ma ng’wi ng’ar i wang’ Yehova: en e lam ma jutimo ku mac ni Yehova.

²⁶Man igam kor nyog rombo mi thier pa Harun, man iwire ni lam m’awira i wang’ Yehova: man ebibedo ni makapiny peri.

²⁷Man idwok kor lam m’awira leng’, man bam mi lam m’ating’a, ma juwiro, ma juting’o, mi nyog rombo m’athiera, en e ma pa Harun, man ma mi wote:

²⁸man ebibedo ni Harun ku wote ni makapiny migi mi nja ku ba nyithindho mir Israel; kum en e lam m’ating’a: man ebibedo ni lam m’ating’a ku ba nyithindho mir Israel mi lam migi mi kwiocwiny, en e lam m’ating’a migi ni Yehova.

²⁹Man kendi ma leng’ pa Harun bibedo ni wote yo ng’eye, ma jubiwirogi i ie, ma jubithierogi de i ie.

³⁰Wode ma jalam kakare bironyogi ceng’ abiro, kinde m’emondo i hema mi cokri kara etim tim i kamaleng’.

³¹Man igam nyog rombo mi thier, man ited ringe i kamaleng’.

³²Man Harun ku wote gibicamu ring’ nyog rombone, ku kwen ma ni i katoko, ba dhugola mi hema mi cokri.

³³Man gibicamu gin maeno ma jutimo kudo adunya, kara uthier man udwokgi leng’: ento jawirok kud ucam kume moko, kum gi leng’.

³⁴Man tek dong ring’o mi thier, kadi kwen, udong’ cil kugweno, ilund iwang’ donge ku mac: jubicame ngo, kum e leng’.

³⁵Man itim kumeni kum Harun, man kum wote, calku lembe ceke m’ang’olo iri: ithiergi ceng’ abiro.

³⁶Ithier thwon dhiang’ ni lam mi dubo ku ba rupiny ku ba rupiny ni adunya: man idwok pemblam leng’, kinde m’itimo adunya pire; man iwire, idwoke ko leng’.

³⁷Itim adunya ceng’ abiro kum pemblamne, man idwoke leng’: man pemblam bibedo leng’ ma sagu; gin ceke ma tek umulo pemblam bibedo leng’.

³⁸Nie maeni en e gin m’ithier wi pemblam: nyithi rombe ario ma rundigi acel acel ku ba rupiny ku ba rupiny thiri thiri.

³⁹Ithier nyathi rombo acel kugweno; man ithier nyathi rombo mucelo uthieno:

⁴⁰man ithier apaje mi mogo ma yom ma i katoko m’ujebre ku mo m’afoda mir ang’wende ma i amorpi; nian ng’et pigulok mir ang’wende ma i amorpi karacelo ku nyathi rombo acel ni lam m’amadha.

⁴¹Man ithier nyathi rombo mucelo uthieno, man itime calku lam mi mogo mi kugweno, man calku lam m’amadhane, ni ng’wic gin ma ng’wi ng’ar, ma lam m’athiera ma jutimo ku mac ni Yehova.

⁴²Ebibedo ni lam m’awang’a ma thiri thiri i kind dhanum’utuk mu i dhugola mi hema mi cokri i wang’ Yehova, ka ma wabirombo ie wakudu, kara wawec keca wakudi.

⁴³E wabirombo ku nyithindho mir Israel keca; man jubidwoko Hema leng’ ku dwong’ para.

⁴⁴Man abidwoko hema mi cokri leng’, ku pemblam: abidwoko Harun bende leng’ ku wote, kara gitim tim ira i tic ma pa jalam.

⁴⁵Man abibedo i kind nyithindho mir Israel, man abibedo Mungu migi.

⁴⁶E gibing’eyo nia an a Yehova Mungu migi, m’uwodhogi woko kud i ng’om Misiri, kara abed i kindgi: an a Yehova Mungu migi.