Read Alur Ai 32 Bible Online

Ai 32 - Alur bible

Ai 32

¹E kinde ma dhanu neno nia Musa galu ku loro piny ku wi got, dhanu gicokri gigi karacelo ba Harun, man giwacu ire kumae, Ai, tim iwa mungu, ma bitelo wiwa; kum pi Musa maeni, ma ng’atu m’uwodhowa kud i ng’om Misiri, wang’eyo gin m’uwok i kume ngo.

²Man Harun uwacu igi kumae, Wutur nzir mi mola ma kwar, ma ni i ith mon mu woko, man mi wotwu, ku mi nyigwu de, man wukel gi i bang’a.

³Man dhanu ceke gituro nzir mi mola ma kwar ma ni i ithgi woko, man gikelogi ba Harun.

⁴Man egamugi kud i cing’gi, man ethiedhe ku jambuka, man etime ni ayi nyathi dhiang’ m’atwaga; e giwacu kumae, Maeni mungu peri, E Israel, m’uwodhi kud i ng’om Misiri.

⁵E kinde ma Harun uneno maeni, eguro pemblam i wang’e; man Harun uketho kwenda, man ewacu kumae, Urwo bibedo ceng agba ni Yehova.

⁶E urwone giai malu pir kugweno, man githiero lam m’awang’a, man gikelo lam mi kwiocwiny; e dhanu bedo piny kara gicam man gimadhi, man giai malu kara gimiel.

⁷E Yehova yero ni Musa kumae, Cidhi, man ilor piny; kum dhanu peri, m’iwodho woko kud i ng’om Misiri, ginyothri gigi:

⁸gilokri cen pio kud i yo m’ang’olo igi: gitimo igi ayi nyathi dhiang’ m’atwaga, man girwo ire, gilamu lam ire de, man giwacu kumae, Maeni mungu peri, E Israel, m’uwodhi woko kud i ng’om Misiri.

⁹E Yehova wacu ni Musa kumae, Aneno dhanu maeni, man, nen, en e dhanu ma ng’utgi tek:

¹⁰ka kumeno kawono weka, kara kwinyo para bogre i kumgi, man kara ajig wigi: man abiketho idoko ni thek ma dwong’.

¹¹E Musa paku dhoge ni Yehova Mungu pare, man ewacu kumae, Yehova, nedi kwinyo peri bogre kum dhanu peri, m’iwodhogi woko kud i ng’om Misiri ku tego ma dit man ku cing’ ma teki?

¹²Pirang’o Jumisiri giyer, giwac kumae, Ewodhogi woko ni lem ma rac, kara eneggi i gudi, man kara ejig wigi kud i wang’ ng’omi? Lokri ni kwinyo peri ma lake tek, man ilokri ni lem ma rac maeni kum dhanu peri.

¹³Poi kum Ibrahim, kud Isak, man Israel, ma gi jutic peri, m’ikwong’o igi ku nyingi giri, man iwacu igi kumae, Abimedo kodhini ma calu cero m’i polo, man ng’om maeni ceke m’ayero pire abimio ni kodhini, man gibigame ni aba mi nja.

¹⁴E Yehova lokre ni lem ma rac m’ewacu nia ebitimo kum dhanu pare.

¹⁵E Musa lokre, man eloro piny ku wi got, ku bankidi ario mi lembatuca i cinge; bankidi ma jugoro wi ng’ete kun ku kun; jugorogi wi ng’ete acel man wi ng’ete mucelo.

¹⁶E bankidi en e tic pa Mungu, lembagorane de en e lembagora pa Mungu, ma jung’iko wi bande.

¹⁷E kinde ma Yocuwa winjo dwand dhanu ka gibewoi, ewacu ni Musa kumae, Ba woi mi lwiny ni i kagonjo.

¹⁸Man ewacu kumae, En e dwand ju m’ukok kum aloci ngo, kadok dwand ju m’uywak kum avoci de ngo; ento awinjo dwand ju m’uwero wer.

¹⁹Man etimbre, kinde m’ewok ceng’ni kagonjo, nia eneno ayi nyathi dhiang’ ku miel: e ng’ecwiny pa Musa bogre, man ebayu bankidi kud i cinge, e gitur the got.

²⁰Man egamu ayi nyathi dhiang’ ma gitimo, man ewang’e ku mac, erege de calu mogo, man ekonje wi pi, man eketho nyithindho mir Israel gimadhi.

²¹Man Musa wacu ni Harun kumae, Dhanu maeni gitimo ang’o iri, m’uketho ikelo dubo ma dit i wigi?

²²Man Harun uwacu kumae, Ng’ecwiny pa rwoth para kud ubogre: ing’eyo dhanu maeni, nia giketho cwinygi kum dubo.

²³Kum giwacu ira kumae, Tim iwa mungu, ma bitelo wiwa; kum pi Musa maeni, ma ng’atu m’uwodhowa kud i ng’om Misiri, wang’eyo gin m’uwok i kume ngo.

²⁴Man awacu igi kumae, Ng’atu ma tek ubedo ku mola ma kwar moko, wek giture woko: kum kumeno gimie i bang’a; man aboie i mac, e nyathi dhiang’ maeni wok.

²⁵E kinde ma Musa neno nia dhanu gigonjri (kum Harun ugonyogi ni ng’iero i kind judegi migi),

²⁶Musa lund ucungo dhugang’ mi kagonjo, man ewacu kumae, Ng’atu ma tek en e jaba Yehova, wek ebin i bang’a. E wot Lawi ceke gicokri gigi karacelo i bang’e.

²⁷Man ewacu igi kumae, Yehova, Mungu mir Israel, uwacu kumae, Ku ba dhanu ceke ng’atuman utwi palamularu pare i piere, man wucidh kun ku kun ugambre dhugang’ utundo dhugang’ i kind kagonjo, man ku ba dhanu ng’atuman uneg umin mire, man ku ba dhanu ng’atuman uneg wadi, man ku ba dhanu ng’atuman uneg jadhugola pare.

²⁸E wot Lawi gitimo calku lembe pa Musa: man kind dhanu rubanga adek upodho i ceng’ maeca.

²⁹Man Musa wacu kumae, Wuthieru giwu tin ni Yehova, kum ku ba dhanu ng’atuman ubedo jadhu wode, man jadhu umin; kara emi mugisa iwu tin.

³⁰Man etimbre urwone, nia Musa wacu ni dhanu kumae, Wudubo dubo ma dit: man kawono Fabiidho malu ba Yehova; kuno nyo abitimo adunya pi dubo mu.

³¹E Musa dok ba Yehova, man ewacu kumae, A, dhanu maeni gidubo dubo ma dit, man gitimo igi mungu mi mola ma kwar.

³²Ento kawono, tek ibiweko dubo migi woko — man tek ungo, akwei, kaba woko kud i kitabu peri m’igoro.

³³E Yehova wacu ni Musa kumae, Ng’atu ma tek udubo ira, abikabu en kud i kitabu para.

³⁴Man kawono cidhi, tel wi dhanu ba ka m’ayero iri: nen, malaika para bicidho i weng’i; ento i ceng’ m’aliewogi i ie, abiliewo dubo migi i wigi.

³⁵E Yehova goyo dhanune, kum gitimo ayi nyathi dhiang’ ma Harun utimo.