Read Alur Ai 35 Bible Online

Ai 35 - Alur bible

Ai 35

¹E Musa coko udul nyithindho mir Israel ceke, man ewacu igi kumae, Maeni lembe ma Yehova ng’olo, nia wutimgi.

²Jubitimo tic ceng’ abusiel; ento ceng’ mir abirone bibedo iwu ceng’ ma leng’, ceng’ sabatu mi yom m’alili ni Yehova: ng’atu ma tek utimo tic moko i ie jubinege.

³Kud wukudh mac i ceng’ sabatu cil i kabedo mu ngung’.

⁴E Musa yero ni udul nyithindho mir Israel ceke, ewacu kumae, Maeni gin ma Yehova ng’olo, ewacu kumae,

⁵Wugam girathiera ni Yehova i kindwu; ng’atu ma tek adundene yenyo, wek ekele, girathiera pa Yehova: mola ma kwar, ku mola ma tar, man mola,

⁶ku gin m’ulweku, kud uluga, man ma kwar ngbo, ku bongu ma nwang’ ma ber, ku yuk diegi,

⁷man lau nyogi rombe ma jukworo, man lau yedi m’i nam, ku yendulu,

⁸man mo mi thala, ku yath ma jwa jwa mi mo m’awira, man mir udok ma ng’wice ng’ar ma lim lim,

⁹ku kidi ma tek ma ju kite, man kidi mir amwona, mir ugoke, man mi jambkor.

¹⁰Man wek ku ba dhanu ceke m’i kindwu ma adundene riek ubin, man etim gin ceke ma Yehova ng’olo:

¹¹en e hema, ku hemane, man jambumne, ku ramakne, ku baune, kud utwindine, ku mbegine, ku werne;

¹²man sanduk, ku yende, ku kabedomikisa, man kusikabongu mi voi;

¹³ku mesa, man yende, kud agulune ceke, man kwen m’anyutha;

¹⁴thethala bende mi der, kud agulune ceke, man thalane, ku mo mi der;

¹⁵man pemblam mir udok ma ng’wice ng’ar, ku yende, ku mo m’awira, kud udok ma ng’wice ng’ar ma lim lim, man voi mi dhugola, ba dhugola mi hema;

¹⁶pemblam mi lam m’awang’a, ku voi mi mola, man yende, kud agulune ceke, man jamblogo ku there;

¹⁷ku gang’bongu mi lelagang’, man mbegine, ku weme, man voi mi dhugang’mi lelagang’;

¹⁸ku gute mi hema, man gute mi lelagang’, ku thondhe;

¹⁹ku kendi ma jucwio ku rieko, mi timotim i kamaleng’, kendi ma leng’ pa Harun ma jalam, man kendi mi wote, kara gitim tic ma pa jalam.

²⁰E udul ceke mi nyithindho mi Israel giai kud i vut Musa.

²¹E gibino, ku ba dhanu ceke m’adundene ting’e, man ku ba dhanu ceke ma cwinye ketho eyenyo, man gikelo girathiera pa Yehova, pi tic mi hema mi cokri, man pi timotimne ceke, man pi kendi ma leng’.

²²Man gibino, co ku mon de, dhanu ceke m’andundegi yenyo, e gikelo jambruko mi kor, ku nzir m’i ith, man lagith mir ayi, ku pogo, jambruko ceke mi mola ma kwar; en e ku ba dhanu ceke m’uthiero girathiera mi mola ma kwar ni Yehova.

²³Man ku ba dhanu ceke, ma junwang’u gin m’ulweku i bang’e, ku m’uluga, man ma kwar ngbo, ku bongu ma nwang’ ma ber, ku yuk diegi, ku lau nyogi rombe ma jukworo, man lau yedi m’i nam, gikelogi.

²⁴Ku ba dhanu ceke m’uthiero girathiera mi mola ma tar man mi mola ekelo girathiera pa Yehova; man ku ba dhanu ceke ma junwang’u yendulu mi tic moko mi timotim i bang’e, ekele.

²⁵E mon ceke m’adundegi riek gicwio ku cing’gi, man gikelo gin ma gicwio, gin m’ulweku, ku m’uluga, man ma kwar ngbo, ku bongu ma nwang’ ma ber.

²⁶Man mon ceke ma cwinygi ting’ogi ku rieko gicwio yuk diegi.

²⁷E judongo gikelo kidi ma tek ma ju kite, man kidi mir amwona, mir ugoke, man mi jambkor;

²⁸man yath ma jwa jwa, ku mo mi thala, man mi mo m’awira, man mir udok ma ng’wice ng’ar ma lim lim.

²⁹Nyithindho mir Israel ukelo girathiera ma ku berocwiny ni Yehova; ku ba dhanu ma co ku mon, m’adundegi ting’ogi ya gikel mi tic ceke, ma Yehova ng’olo nia utimbre ni kum Musa.

³⁰E Musa wacu ni nyithindho mir Israel kumae, Nen, Yehova lwong’o Bezalel ku nyinge, ma wod Uri, ma wod Hur, mi suru pa Yuda;

³¹man epong’e ku Tipo pa Mungu, ku rieko, ku ng’eyothelembe, ku ng’eyong’ec, man tic mi bodho ma kwonde tung’ tung’ ceke;

³²kara epar tic mi rieko, kara etim ku mola ma kwar, man ku mola ma tar, man ku mola,

³³man mi tong’o kidi mir amwona, man mi ng’iko yen, kara etim i tic ceke mi bodho ma kwonde tung’ tung’.

³⁴Man eketho i adundene nia eponj, en ku Aholiab, ma wod Ahisamak, mi suru pa Dan.

³⁵Epong’o joni ku rieko mir adunde, kara gitim tic mi bodho ma kwonde tung’ tung’, mi ng’iko, man pa jabodho ma riek, man pa jakwoc mi ruko, i gin m’ulweku, man i m’uluga, i ma kwar ngbo de, man i bongu ma nwang’ ma ber, man pa jacwibongu, en e mi ju m’utimo tic mi bodho moko, man mi ju ma paru tic mi rieko.