Read Alur Ai 36 Bible Online

Ai 36 - Alur bible

Ai 36

¹Man Bezalel giku Aholiab gibitimo tic, man ku ba dhanu ceke ma adundegi riek, ma Yehova ketho rieko ku ng’eyothelembe i ie maram etim ko tic ceke mi timotim mi kamaleng’, calku gin ceke ma Yehova ng’olo.

²Man Musa Lwong’o Bezalel giku Aholiab, man ku ba dhanu ceke ma adundene riek, ma Yehova ketho rieko i adundene, en e ku ba dhanu ceke ma cwinye ting’e ya ecidh etim tije:

³man gigamu ba Musa girathiera ceke ma nyithindho mir Israel ukelo mi tic mi timotim mi kamaleng’, ma gitime kudo. E gicikukelo girathiera ma ku berocwiny i bang’e ku ba rupiny ku ba rupiny.

⁴E dhanu ceke ma riek, m’utimo tic ceke mi kamaleng’, ku ba dhanu ceke ng’atuman uai i tic pare m’etimo;

⁵e giyero ni Musa, giwacu kumae, Dhanu gikelo piny dit ma sagu m’uromo mi timotim mi tic ma Yehova ng’olo ya jutim.

⁶E Musa ng’olo, man giketho juyero i kagonjo ceke, giwacu kumae, Kud wuyi co kadi mon gitim tic moko kendo mi girathiera mi kamaleng’. Kum kumeno jucero dhanu kukelo.

⁷Kum piny ma gibedo ko romo mi timo tije ceke, man esagu.

⁸Dhanu ceke de m’i kindgi ma adundegi riek m’utimo ticne gitimo hema ku kusikabongu apar; mi bongu ma nwang’ ma ber m’awia, ku m’ulweku, ku m’uluga, man ma kwar ngbo, ku kerubi, ma tic pa jabodho ma riek, Bezalel utimogi.

⁹Kabor mi kusikabongu kubang’gi kubang’gi en e bot pier ario wi abora, man kalac mi kusikabongu kubang’gi kubang’gi en e bot ang’wen: kusikabongu ceke porne acel.

¹⁰Man eribo kusikabongu abic acel kum wadi acel kum wadi: man kusikabongu abic mucelo eribo acel kum wadi acel kum wadi.

¹¹Man etimo ukol m’ulweku wi dhu kusikabongu acel i dhoge mi karibne: etimo ukol i dhu kusikabongu ma yo woko i karibne mir arionde de kumeca.

¹²Etimo ukol pier abic wi kusikabongu acel, man ukol pier abic i dhu kusikabongu ma ni i karib mir arionde: ukolne lokre yo ba wadi.

¹³Man etimo ramak mi mola ma kwar pier abic, man eribo kusikabongu acel kum wadi ku ramakne: kum kumeno hema en e acel.

¹⁴Man etimo kusikabongu mi yuk diegi ni hema ma wi hema: etimo gi ni kusikabongu apar wi acel.

¹⁵Kabor mi kusikabongu kubang’gi kubang’gi bot pier adek, man kalac mi kusikabongune kubang’gi kubang’gi bot ang’wen: kusikabongu apar wi acel porne acel.

¹⁶Man eribo kusikabongu abic karacelo, man kusikabongu abusiel karacelo.

¹⁷Man etimo ukol pier abic dhu kusikabongu ma yo woko i karib, man ukol pier abic wi dhu kusikabongu ma yo woko i karib mir arionde.

¹⁸Man etimo ramak pier abic mi mola kara urib hema karacelo, kara ebed acel.

¹⁹Man etimo jambum mi hema mi lau nyogi rombe ma jukworo, man jambum mi lau yedi m’i nam i wie.

²⁰Man etimo bau mi hema ku yendulu, m’ucungo atira.

²¹Kabor mi bau acel bot apar, man kalac mi bau acel bot acel ku katumbla.

²²Bau kubang’e kubang’e, ubedo ku dhoge ario, m’uribre acel ku wadi: etimo kumeca pi bau ceke mi hema.

²³Man etimo bau mi hema: bau pier ario mi ng’ete ma yor ariwa ma piny yo piny;

²⁴man etimo wer pier ang’wen mi mola ma tar the bau pier ario; wer ario the bau acel mi dhoge ario, man wer ario the bau acel mi dhoge ario.

²⁵Man mi ng’ete mir arionde mi hema, i ng’ete ma yor ariwa ma malu, etimo bau pier ario,

²⁶man weme pier ang’wen mi mola ma tar; wer ario the bau acel, man wer ario the bau mucelo.

²⁷Man mi ng’et hema yo ng’eye yo reto etimo bau abusiel.

²⁸Man etimo bau ario mi gund hema ma yor i ng’eye.

²⁹Man gibedo ario ario yo piny; man gibedo bo kumeca cil kum wie ba wende acel: etimo kumeca i kumgi gin ario i gui ario.

³⁰Man bau nuti abora, ku weme mi mola ma tar, wer apar wi abusiel; wer ario the bau kubang’e kubang’e.

³¹Man etimo riu ku yendulu; riu abic mi bau mi ng’et hema acel,

³²man riu abic mi bau mi ng’et hema mucelo, man riu abic mi bau mi hema ma yor i ng’eye yo reto.

³³Man etimo riu m’i diere ukadhu ku kind bau ugambre i ng’ete kucel utundo kum ng’ete mucelo.

³⁴Man emwono bau ku mola ma kwar, man etimo wende ku mola ma kwar mi kaka riu, man emwono riu ku mola ma kwar.

³⁵Man etimo kusikabongu m’ulweku, man m’uluga, man ma kwar ngbo, ku bongu ma nwang’ ma ber m’awia: ku kerubi, ma tic pa jabodho ma riek, etime.

³⁶Man etimo mbegi ang’wen pire mi yendulu, man emwonogi ku mola ma kwar: golne en e mi mola ma kwar; man ethiedho igi wer ang’wen mi mola ma tar.

³⁷Man etimo voi mi dhugola mi Hema, m’ulweku, man m’uluga, ku ma kwar ngbo, man bongu ma nwang’ ma ber m’awia, ma tic pa jakwoc mi ruko;

³⁸man mbegi abic pire ku golne: man emwono wie ku jambwicne ku mola ma kwar; man weme abic en e mi mola.