Read Alur Ai 37 Bible Online

Ai 37 - Alur bible

Ai 37

¹Man Bezalel utimo sanduk ku yendulu; kaborne bot ario ku katumbla, man kalacne bot acel ku katumbla, man kadongone bot acel ku katumbla.

²Man emwone ku mola ma kwar ma leng’ yor i ie ku yo woko, man etimo ruko mi mola ma kwar i kume utieke gbur.

³Man ethiedho wende ang’wen mi mola ma kwar pire, i tiende ang’wen; en e wende ario i ng’ete acel, man wende ario i ng’ete mucelo.

⁴Man etimo yen mi yendulu, man emwonogi ku mola ma kwar.

⁵Man eroyo yen i wende i ng’et sanduk, mi yeyo sandukne.

⁶Man etimo kabedomikisa mi mola ma kwar ma leng’: kaborne bot ario ku katumbla, man kalacne bot acel ku katumbla.

⁷Man etimo kerubi ario mi mola ma kwar; etimogi ku tic mir afoda, i kajikne ario mi kabedomikisa;

⁸kerubi acel i kajik acel, man kerubi acel i kajik mucelo: etimo kerubi ku piny acel karacelo ku kabedomikisa i kajikne ario.

⁹E kerubi girieyo bombgi ku malu, ma giumo ko kabedomikisa ku bombgi, wang’ acel ni yo ba wadi wang’ mucelo de ni yo ba wadi; wang’ kerubi ni yo ba kabedomikisa.

¹⁰Man etimo mesa mi yendulu: kaborne bot ario, kalacne bot acel, man kadongone bot acel ku katumbla.

¹¹Man emwone ku mola ma kwar ma leng’, man etimo ruko mi mola ma kwar i kume utieke gbur.

¹²Man etimo jambgwok i kume ma ro ku laccing’ utieke gbur, man etimo ruko mi mola ma kwar kum jambgwokne utieke gbur.

¹³Man ethiedho wende ang’wen mi mola ma kwar i kume pire, man eketho wende wi gunde ang’wen ma ni kum tiende ang’wen.

¹⁴Wende ma ka mi yen mi yeyo mesa ni ceng’ni jambgwok.

¹⁵Man etimo yen ku yendulu, man emwonogi ku mola ma kwar, mi yeyo mesa.

¹⁶Man etimo agulu ma ni wi mesa, ku tabune, man upalne, man kikombene, kud upokone, ma jukonjo ko, mi mola ma kwar ma leng’.

¹⁷Man etimo thethala mi mola ma kwar ma leng’: man etimo thethala ku tic mi girafoda, en e tiende, ku yende; tabune, man tiendedhok, ku thiwe, en e mi piny acel karacelo kude.

¹⁸Man jange abusiel nuti m’uai i ng’ete; jang thethala adek uai i ng’ete acel, man jang thethala adek uai i ng’ete mucelo:

¹⁹tabu adek ma jutimo calu thiu akpalakpala ni i kum jange adek, tiendedhok man thiwe; man tabu adek ma jutimo calu thiu akpalakpala kum jange mucelo, thiendedhok ku thiwe: kum jange abusiel m’uai i kum thethala de kumeca.

²⁰Man tabu ang’wen ni i kum thethala nia jutimo calu thiu akpalakpala, tiendedhok, man thiwe;

²¹man tiendedhok the jange ario mi piny acel karacelo kude, man tiendedhok the jange ario mi piny acel karacelo kude, man tiendedhok the jange ario mi piny acel karacelo kude, mi jange abusiel m’uai i kume.

²²Tiendedhok ku jange en e mi piny acel karacelo kude: kume dho en e tic acel mi girafoda mi mola ma kwar ma leng’.

²³Man etimo thalane abiro, ku makasine, ku tabu mi makasine, mi mola ma kwar ma leng’.

²⁴Etime kud agulune ceke ku talanto acel mi mola ma kwar ma leng’.

²⁵Man etimo pemblam mir udok ma ng’wice ng’ar ku yendulu: kaborne bot acel, man kalacne bot acel, dhoge rom rom; man kadongone bot ario; tunge en e piny acel karacelo kude.

²⁶Man emwone ku mola ma kwar ma leng’, wie, ku ng’ete m’utieke gbur, ku tunge: man etimo ruko mi mola ma kwar i kume utieke gbur.

²⁷Man etimo wende ario mi mola ma kwar i kume the rukone, kum wel ng’ete ario, kum ng’ete ario, mi kaka yen ma juyeye ko.

²⁸Man etimo yen ku yendulu, man emwonogi ku mola ma kwar.

²⁹Man etimo mo ma leng’ mir awira, kud udok ma ng’wice ng’ar ma leng’ mi yath ma jwa jwa ma lim lim, calku tic pa jated girang’wiya.