Read Alur Ai 40 Bible Online

Ai 40 - Alur bible

Ai 40

¹E Yehova yero ni Musa, ewacu kumae.

²I ceng’ ma kwong’ane mi dwi ma kwong’ane iting’ hema mi hema mi cokri malu.

³Man iketh sanduk mi lembatuca i ie, man ium sandukne ku kusikabongu.

⁴Man iroi mesa i ie, man iketh gin ma ni i wie kakare; man iroi thethala i ie, man icwiny thalane.

⁵Man iketh pemblam mi mola ma kwar mir udok ma ng’wice ng’ar i wang’ sanduk mi lembatuca, man iketh voi wi dhugola kum hema.

⁶Man iketh pemblam mi lam m’awang’a i wang’ dhugola mi hema mi hema mi cokri.

⁷Man iketh jamblogo i kind hema mi cokri ku pemblam, man iketh pi i ie.

⁸Man iting’ gang’ mi lelagang’ utieke gbur, man ing’ab voi mi dhugang’ mi lelagang’.

⁹Man igam mo m’awira, man iwir hema, ku giki ceke ma ni i ie, man idwoke leng’, ku jambe ceke: e ebibedo leng’.

¹⁰Man iwir pemblam mi lam m’awang’a, kud agulune ceke, man idwok pemblamne leng’: e pemblamne bibedo leng’ m’usagu.

¹¹Man iwir jamblogo ku tiende, man idwoke leng’.

¹²Man ikel Harun ku wote ba dhugola mi hema mi cokri, man ijomgi ku pi.

¹³Man iketh kendi ma leng’ kum Harun; e iwire ku mo, man idwoke leng’, kara etim tim ira i tic ma pa jalam.

¹⁴Man ikel wote, e irony gi ku kanzu;

¹⁵man iwirgi ku mo, calu iwiro weggi, kara gitim tim ira i tic ma pa jalam: man wir migi bibedo igi ni lamulam mi nja i kind dhanum’utuk migi ceke.

¹⁶E Musa timo kumeca: calku gin ceke ma Yehova ng’olo ire, etimo kumeca.

¹⁷Man etimbre i dwi ma kwong’ane mi rundi mir arionde, i ceng’ ma kwong’ane mi dwije, nia hema cungo.

¹⁸E Musa ting’o hema man eketho werne, e eting’o baune malu, man eroyo utwindine, man eting’o mbegine malu.

¹⁹E epedho hema wi hema, man eketho jambum mi hema malu i wie; calu Yehova ng’olo ni Musa.

²⁰E egamu lembatuca eketho i sanduk, man eketho yen i sandukne, man eketho kabedomikisa malu wi sandukne:

²¹e ekelo sandukne i hema, man eketho kusikabongu mi voi malu, man eumo sanduk mi lembatuca; calu Yehova ng’olo ni Musa.

²²Man eketho mesa i hema mi cokri, wi ng’et hema ma yor ariwa ma malu, yo woko ku kusikabongu.

²³Man eketho kwen kakare i wie i wang’ Yehova; calu Yehova ng’olo ni Musa.

²⁴Man eroyo thethala i hema mi cokri, i wang’ mesa, wi ng’et hema ma yor ariwa ma piny.

²⁵Man ecwinyo thala i wang’ Yehova; calu Yehova ng’olo ni Musa.

²⁶Man eketho pemblam mi mola ma kwar i hema mi cokri i wang’ kusikabongu:

²⁷man ewang’u udok ma ng’wice ng’ar mi yath ma jwa jwa ma lim lim i wie; calu Yehova ng’olo ni Musa.

²⁸Man eketho voi mi dhugola kum hema.

²⁹Man eketho pemblam mi lam m’awang’a i dhugola mi hema mi hema mi cokri, man ethiero lam m’awang’a ku lam mi mogo i wie; calu Yehova ng’olo ni Musa.

³⁰Man eketho jamblogo i kind hema mi cokri ku pemblamne, man eketho pi i ie, ma julogo kudo.

³¹E Musa giku Harun ku wote gilogo cing’gi ku tiendgi i ie;

³²kinde ma gimondo i hema mi cokri, man kinde ma gibino ceng’ni ba pemblamne, gilogo; calu Yehova ng’olo ni Musa.

³³Man eting’o gang’ kum lelagang’ m’utieko hema ku pemblam gbur, man eting’o voi mi dhugang’ mi lelagang’ malu. Ka kumeno Musa daru tije.

³⁴Afuru lund uumo hema mi cokri, man dwong’ pa Yehova pong’o hema.

³⁵E Musa copo mondo i hema mi cokri ngo, kum afuru bedo i wie, man dwong’ pa Yehova pong’o hemane.

³⁶E kinde ma afuru tingre ku wi hema nyithindho mir Israel giwotho, cil i woth migi ceke:

³⁷ento tek afuru tingre ngo, e giwotho ngo maram ceng’ uwok ko m’etingre ie malu.

³⁸Kum afuru pa Yehova ni wi hema ku dieceng’, man mac ni i ie ku diewor, i wang’ juot mir Israel ceke, cil i woth migi ceke.