Read Alur Yob 1 Bible Online

Yob 1 - Alur bible

Yob 1

¹Ng’atu moko nuti i ng’om Uz, ma nyinge Yob: e ng’atu maeno bedo ndhu cu man atira, en e ng’atu ma lworo Mungu de, man elokre cen ni dubo.

²Man junyolo ire wote abiro ku nyige adek.

³Lim pare bende rombe rubanga abiro, ku ngamia rubanga adek, man koni dhiang’ ma ku mberembere dak abic, man mege kana dak abic, ku juudi dit apila; ketho nia ng’atu maeni dit m’usagu nyithindho ma yo nyangu ceke.

⁴E wote gicidho man giketho agba i udigi kubang’gi kubang’gi, ng’atuman i ceng’ pare man i ceng’ pare; e gioro man gilwong’o nyimeggi adek kara gicam gimadh gikugi.

⁵E etimbre, kinde ma ceng’ mir agba migi rombo, nia Yob uoro man edwokogi leng’, man eai pir kugweno, e ethiero lam m’awang’a calku welgi ceke: kum Yob uwacu kumae, Kuno nyo wota dubo, man gicayu Mungu ku yor i adundegi. Yob utimo kumeno thiri thiri.

⁶Nie etimbre i ceng’ ma wot Mungu cidho nithieri gigi ni wang’ Yehova, nia ma Jok bende bino kindgi

⁷E Yehova wacu ni Jok kumae, Iai kani? Jok ulund udwoko lembe ni Yehova, man ewacu kumae, Aai wotho kun ku kun i ng’om, man aai wotho malu man piny i ie.

⁸E Yehova wacu ni Jok kumae, Iparu pi jatic para ma Yobi? kum ng’atu moko mbe ma calu en i ng’om, ng’atu ma ndhu cu man atira, ng’atu ma lworo Mungu, man ma lokre cen ni dubo.

⁹Jok ulund uloko lembe ni Yehova, man ewacu kumae, Yob ulworo Mungu mananu?

¹⁰Itwodo arara i kume ngo, man kum ot pare, man kum gin ceke m’ebedo ko, i ng’ete gbur ungo? imio mugisa kum tic m’i cinge, e lim pare nyai i ng’om.

¹¹Ento riei cingi kawono, man imul gin ceke m’ebedo ko, e ebicei i weng’i.

¹²E Yehova wacu ni Jok kumae, Nen, gin ceke m’ebedo ko ni i cingi; ndhu i kume re ma kud iketh cingi. Kum kumeno Jok uwok woko kud i wang’ Yehova.

¹³Man etimbre i ceng’ ma wote ku nyige gibecamu man gibemadhu i ot p’umeggi ma jadit,

¹⁴nia jakwenda bino ba Yob, man ewacu kumae, Koni dhiang’ ubeloko ng’om, man kana de becamu i ng’etgi;

¹⁵e dhanu mi Seba gicori i wigi, e gicidho kugi: eyo, ginego jutic ku lak palamularu; e an a kenda e m’aboth niyero iri.

¹⁶Kinde ma fodi ebeweco, ng’atu mange bende bino, man ewacu kumae, Mac pa Mungu podho kud i polo, man ewang’u rombe ku jutic, e ewang’ugi kot; e an a kenda e m’aboth niyero iri.

¹⁷Kinde ma fodi ebeweco, ng’atu mange bende bino, man ewacu kumae, Jukaldayo gipokri ni njuru dhanu adek, man giloi wi ngamia, e gicidho kugi, eyo, man ginego jutic ku lak palamularu; e an a kenda e m’aboth niyero iri.

¹⁸Kinde ma fodi ebeweco, ng’atu mange bende bino, man ewacu kumae, Woti ku nyigi gibecamu man gibemadhu pigulok i ot p’umeggi ma jadit;

¹⁹man, nen, yamu ma dit uai i langa, man eturo gundot ang’wen, e epodho wi ju m’aradu, e githo; e an a kenda e m’aboth niyero iri.

²⁰Yob ulund uai, e eyeco kanzu pare, man egwaru wie, e epodho piny i ng’om, man erwo;

²¹e ewacu kumae; Awok kud i ma muneru, e abidok de muneru: Yehova mio, e Yehova kabu woko; mugisa bed kum nying’ Yehova.

²²I maeni ceke Yob udubo ngo, kadi edwoko lembe rac de ngo ni Mungu.