Read Alur Yob 10 Bible Online

Yob 10 - Alur bible

Yob 10

¹Ng’eyong’ec para ol ku kwo para; Abicera ngo ni cur para; Abiweco i ulecu mi ng’eyong’ec para.

²Abiwacu ni Mungu kumae, Kud igonja; Nyuth ira gin m’i-ii kuda pire.

³E ber iri ya isend jo, Ya icai tic m’i cingi, Man irieny wi lembapora mi judubo?

⁴Ibedo ku weng’i mi ring’kumi? Kadi ineno calu dhanu neno?

⁵Nindo peri calu nindo mi dhanu, Kadi rundi peri calu ceng’ mi dhanu,

⁶Ma nia ipenj pi kier para, Man iyeny dubo para,

⁷Kadok ing’eyo nia an a jadubo ngo, Man ng’atu moko mbe ma copo bodho kud i cingi?

⁸Cingi cwia man eng’ina Karacelo gbur; ento inyotha.

⁹Poi, akwei, nia ing’ina calu ulobo; Man ibitera i utur kendo?

¹⁰Ikonja woko calu cak ungo, Man ing’ina calu lungu cak ungo?

¹¹Ironya ku dendkum man ring’kum, Man iriba karacelo ku cogo man ler.

¹²Imio ira kwo man mer mi bero; Man lieu peri gwoko tipona.

¹³Ento gin maeni ipanu i cwinyi; Ang’eyo nia maeni ni i beng’i:

¹⁴Tek adubo, ilund iketh weng’i i kuma, Man ibiweko kier para woko ngo.

¹⁵Tek a jadubo, can i wia; Man tek abedo pwe, ento abiting’o wia malu ngo, M’apong’ ku lewic, M’abeneno ko wi masendi para.

¹⁶Man tek wia dodre gire, idwara calu umvor; Man inyuthri giri i wia kendo ma wang’u ijo.

¹⁷Iketho jumulembe ma nyen uwok i kuma, Man inyayu ng’ecwiny peri i kuma: Lokri ku lwiny ni karacelo kuda.

¹⁸Ka kumeno pirang’o iwodha woko kud i ici? Kuno di cwinya kadhu, man wang’ moko mbe m’unena.

¹⁹Kuno di abedo calu m’ambe; Kuno di jugama kud i ic jutera i liel.

²⁰Nindo para nok ungo? ka kumeno jige, Man weka a kenda, kara anwang’ juk nyanok,

²¹Ma fodi acidho ngo i ka m’abidong’ dwogo ngo, En e i ng’om mi mudho man mi tipo mi tho;

²²En e ng’om ma col calu mudho ma bii, En e ng’om mi tipo mi tho, m’umbe ku girayika, Man ka ma der calu mudho ma bii.