Read Alur Yob 12 Bible Online

Yob 12 - Alur bible

Yob 12

¹Yob ulund uloko lembe man ewacu kumae,

²Wun wu dhanu mandha, Man rieko bitho kudu.

³Ento an a won ng’eyong’ec calu wun; An a nok ungo iwu: Eyo, ng’a ma kung’eyo wadi gin maeni ngo?

⁴An a calu ng’atu ma jamng’iero ni wat para, An m’alwong’o Mungu, e eloko lembe: Ng’atu ma pwe, ng’atu ma ndhu cu en e jamng’iero.

⁵Cac ma kum ruvwa nuti i pidoic pa ng’atu m’ubedo yo; Ebedo ayika ni ju ma tiendgi kier.

⁶Lembe bedo miero ni hema mi weg ayeki, Man ju m’unyayu ng’ecwiny i Mungu gibedo museme; Ma Mungu mio piny i cing’gi k’abamba.

⁷Ento kawono penj yedi, e gibiponji; Man winyo ma korpolo, e gibiyero iri:

⁸Kadi wec ku ng’om, e ebiponji; Man rec m’i nam biyero iri.

⁹Ng’a m’ung’eyo ngo ni kum gin maeni ceke, Nia cing’ Yehova timo maeni,

¹⁰Ma ng’eyong’ec mi gin ma kwo kubang’e kubang’e ni i cinge, Man yuyo mi nyithi dhanu ceke?

¹¹Ith mulo lembe ngo, Cil calu dhok bilo cemo pare?

¹²Rieko nuti ku judongo, Man ng’eyolembe de nuti i nindo m’ung’adu.

¹³Rieko ku tego ni ku Mungu; Ebedo ku lembapora ku ng’eyolembe.

¹⁴Nen, erwombo piny, e jucopo gome kendo ngo; Eciko ba dhanu, man yabu copre ngo.

¹⁵Nen, ecero pi, man gidwono; Kendo, eorogi woko, e ging’ielo ng’om.

¹⁶Tego ku rieko ni kude; Ju ma jubombogi ku won abombi gi pare.

¹⁷Etelo wi juporlembe ma juyakugi cen, Man edwoko jupoklembe ni jukusegu.

¹⁸Egonyo twic p’ubimo, Man etwio piergi ku foto.

¹⁹Etelo wi julam ma juyakugi cen, Man eng’ielo jutego.

²⁰Ekabu wec mi ju mandha, Man ekabu ng’eyong’ec mi judongo woko.

²¹Ekonjo cac wi judongomawijo, Man egonyo del mi jutego.

²²Eyabu gin ma thuth kud i mudho Man ewodho tipo mi tho i der.

²³Enyayu thek, man enyothogi; Emedo kum thek, man eterogi i ng’eca.

²⁴Ekabu ng’eyong’ec woko ku ba rwodhi mi dhanu m’i ng’om, Man eketho giwiri i langa ka ma yo mbe i ie.

²⁵Gimulo piny i mudho ma der umbe; Man eketho giwotho pik pik calu ju m’umer ku kong’o.