Read Alur Yob 13 Bible Online

Yob 13 - Alur bible

Yob 13

¹Nen, wang’a neno maeni ceke, Itha winjo man eng’eye.

²Gin ma wung’eyo, eno ang’eyo bende: Wusaga ngo.

³Andha kuno di waweco ku Jategokpo, Man ayenyo wapor lembe waku Mungu.

⁴Ento wun wu jukieu lemndra; Wun ceke wu weg yath ma kabeng’wu mbe.

⁵A, maku wuling’ tii! Man kuno di ebedo rieko iwu.

⁶Kawono wuwinj lembapora para, Man wuwinj piem mi dendhoga.

⁷Wubiweco lembe ma pwe ngo pi Mungu, Man wubiweco kud abombi pire?

⁸Wubiyungo wang’e? Wubipiemo piem pi Mungu?

⁹E ber ya eyenywu? Kadi calu ng’atu moko bombo dhanu, e wubibombe?

¹⁰Ebijukowu andha, Tek wuketho dhanu bedo tung’ tung’ i weng’wu mung’ mung’.

¹¹Dwong’ pare binyayu lworo i iwu ngo, Man ndiri pare podho i wiwu?

¹²Wec mu mi poi gi lembrieko mi vuru, Gang’ mu en e gang’ mir ulobo.

¹³Wuling’, wuweka a kenda, kara aweci; Man wuwek gin m’ubewok i wia uwoki.

¹⁴Pirang’o agam ring’kuma i laka, Man aketh kwo para i cinga?

¹⁵Kadok enega; ento abikure asu; Ento abicungo kum yo para i wang’e.

¹⁶Maeni bende bibedo both para, Nia ng’atu m’ayi Mungu mbe i kume kud ubin i wang’e.

¹⁷Wuwinj wec para cu, Man wuwek luro i lembe para winjre i ithwu.

¹⁸Kawono nen, aketho lembe para kakare; Ang’eyo nia a pwe.

¹⁹Ng’a ma wabi-ii wakude? Kum tek aling’ kuno di cwinya kadhu.

²⁰Ndhu kud itim lembe ario i kuma; E abipondo ngo ni weng’i:

²¹Kab cingi bor kud i kuma; Man kud iyi ndiri peri nyai lworo i ia.

²²Ilund ilwong’a, e abiyi; Kadi wek aweci, man ilok ira lembe.

²³Kier para ku dubo para gin adi? Keth ang’ei gondri para ku dubo para.

²⁴Pirang’o ipanu weng’i Man ikwana calu jadegini?

²⁵Ibisendo ith uboko m’ukoto? Man ibiriemo soka m’uthwo?

²⁶Kum igoro gin ma kec i kuma, Man iketho agamu kier mir aradu ni musolu:

²⁷Iketho tienda bende i kol, Man iketho weng’i kum yo para ceke; Iketho kieu kum ba tienda:

²⁸Kadok a calu gin ma top ma thum, Calu kendi ma abirbir camu.