Read Alur Yob 14 Bible Online

Yob 14 - Alur bible

Yob 14

¹Ng’atu ma nico, ma dhaku nyolo, Nindo mi bedo pare nok, man epong’ ku can.

²Etwi calu thiuboko, e juthume piny: Eringo bende calu tipopiny, e ebedo ngo.

³Man iyabu weng’i kum ng’atu ma calu maeni, Man ikela i titi wakudi?

⁴Ng’a ma copo wodho gin ma leng’ kud i gin m’ucido? acel de mbe.

⁵Kum jung’olo nindo pare, Wel dwi pare ni karacelo kudi, Man ing’olo pi kieu pare kara kud ekadhi;

⁶Kud inene, kara eyom, Maram etim ko ceng’ pare kakare, calu won sukulia.

⁷Kum genogen mi yen nuti, Tek jung’ole piny, nia ebiloth kendo, Man nia jange ma yomne bithum ungo.

⁸Kadok ulage fur i ng’om, Man dunde top i ng’om:

⁹Ento ni kum ng’wic pi ebikudo, Man ebilodho jange calu girapidha.

¹⁰Ento dhanu tho, man jukethe piny: Eyo, dhanu cwinye kadhu, e eni kani?

¹¹Calu pi dwono kud i nam, Man kulo nyothre man edwono;

¹²E dhanu vuto piny kumeca man eai ungo: Maram polo bedo umbe kendo, gibiceu ungo, Kadi jubicewogi de ngo ku wang’ nindo migi.

¹³A, maku ipana i liel, Tek igwoka ling’, maram kwinyo peri kadhu ko, Tek ing’olo ira nindo ma juketho, man ipoi pira!

¹⁴Tek dhanu tho, ebikwo kendo? Kuno di akuro nindo ceke mir ali para, Maram gony para wok ko.

¹⁵Kuno di ilwong’o, man kuno di aloko iri lembe: Kuno di ibedo kud ava tic m’i cingi.

¹⁶Ento kawono ikwanu dakutielo para: Ikuro dubo para ngo?

¹⁷Jumwono wi gondri para i usau, Man itwio kier para.

¹⁸Ento got m’upodho doko ni gin mananu; Man judaku cana kud i kakare;

¹⁹Pi jwigo kidi; Pi m’upong’ne molo kwio m’i ng’om: Inyotho genogen mi dhanu kumeca.

²⁰Isage thiri thiri, e ekadhu; Iloko wang’e, man icore cen.

²¹Wote bino ba yung, e eng’eyo ngo; E jujwigogi, ento eng’eyo lembe migi ngo.

²²Ento ring’kume m’i wie bedo ku remokum, Man ng’eyong’ec pare ywak yor i ie.