Read Alur Yob 15 Bible Online

Yob 15 - Alur bible

Yob 15

¹Elifaz ma Jatemani lund uloko lembe, man ewacu kumae,

²Maku jarieko lok lembe ku ng’eyong’ec mananu, Man epong’ ie ku yamu ma yo nyangu?

³Man epor lembe ku wec ma kulokane mbe, Kadi ku wec m’ecopo timo kudo gin ma ber ungo?

⁴Eyo, ikabu lworo cen, Man icero pidoie mi rwo i wang’ Mungu.

⁵Kum kier peri ponjo dhogi, Man ifoyo leb mir abombi.

⁶Dhogi giri gonji, anre ngo; Eyo, dendhogi giri tuco wii.

⁷In i dhanu ma kwong’a ma junyolo? Kadi jular junyoli ni ungulu gudi?

⁸Iwinjo lembapora ma mung’ mung’ pa Mungu? Man icero rieko iri giri?

⁹Ing’eyo ang’o, ma wakung’eyo ngo? Ing’eyo ang’o, m’umbe i iwa?

¹⁰Ju ma wigi ju lwar ku ju m’uti yere yere gini karacelo kudwa, Ma giti ma sagu wuru.

¹¹Juk pa Mungu nok hai iri, En e lembe m’ubedo yo yor i beng’i?

¹²Nedi adundeni teri ceni? Man nedi weng’i ogre?

¹³Ma nia iketh cwinyi mir ali kum Mungu, Man iyi lembe wok woko kud i dhogi?

¹⁴Dhanu en e ang’o, ma nia ebedo leng’i? Man ng’atu ma dhaku nyolo, ma nia ebedo pwe?

¹⁵Nen, eketho genogen ungo kum jumaleng’ pare; Eyo, polo de leng’ ungo i wang’e:

¹⁶E ka ng’atu ma judagu m’unyothre ke bibedo nenedi, Dhanu ma madhu kier calu pi!

¹⁷Abinyutho iri, winja; Man maeno m’aneno abiyero

¹⁸(Ma jurieko yero Ugambre kum weggi, man gimung’e ngo;

¹⁹Ma ng’om umire igi gi kendgi, Man jawirok moko mbe m’ukadhu i kindgi):

²⁰Jadubo sendre ku remokum nindo pare ceke, En e wel rundi m’ukandre malu ni jasend.

²¹Badwal mi ndiri ni i ithe; I mierolembe janyoth bibino i wie.

²²Eyio ngo nia ebidwogo kud i mudho, E palamularu bekure.

²³Ewotho mba mba pi kwen, ewacu kumae, Eni kani? Eng’eyo nia ceng’ mi mudho bedo ayika ni cinge.

²⁴Lem ma tek ku ndiba nyayu lworo i ie; Gisage, calu ubimo m’ubedo ayika ni lwiny.

²⁵Kum erieyo cinge kum Mungu, Man etimbre gire ku kuhaya kum Jategokpo;

²⁶Eringo i kume ku ng’ute m’ucikre, Ku jam thungu pare ma dit;

²⁷Kum eumo wang’e ku mione, Man ecoko mio i piere;

²⁸Man ebedo i adhura mir uvuru, I udi ma ng’atu moko mbe m’ubedo i ie, M’ubedo ayika mi doko ni udhuru;

²⁹Ebilony ungo, kadok piny pare de bibedo ngo, Kadok piny migi de binyai ungo i ng’om.

³⁰Ebiai ungo kud i mudho; Lebmac biketho jange thwo, Man ebicidho cen ni kum lietho m’i dhu Mungu.

³¹Kud egen gin ma ie nanu, m’ebombre ko gire; Man gin ma ie nanu bibedo sukulia pare.

³²Ebitimbre ma fodi nindo pare kutundo ngo, E jange bibedo numu ngo.

³³Ebioyo ulokne ma fodi kucek ungo calu yendulok, Man ebilunyo thiwe calu yendulam.

³⁴Kum wadi ju ma ayi Mungu mbe i kumgi bibedo lule, Man mac biwang’u hema mi jamblembe.

³⁵Gigamu ic mi ndre, man ginyolo kier, Man cwinygi yiko abombi.