Read Alur Yob 16 Bible Online

Yob 16 - Alur bible

Yob 16

¹Yob ulund uloko lembe man ewacu kumae,

²Awinjo wadi lembe maeno dupa: Kewu ceke wu jujuk ini olo.

³Lembe ma ie nanu kajikne nuti? Kadi ang’o m’unyayu ng’ecwiny i ii ketho iloko lembe?

⁴An bende acopo yero calu wuyero; Tek ng’eyong’ec mu ni i ka ng’eyong’ec para, Acopo ribo lembe i kumwu, Man ayengo wia i kumwu.

⁵Ento kuno di adwokowu tek ku dhoga, Man kuno di juk m’i dendhoga jwigo can mu.

⁶Kadok aweco, can para jwik ungo; Man kadok aling’, ang’o m’uweka?

⁷Ento kawono eola; Iketho udul para ceke doko ni uvuru.

⁸Man imaka ki, ma en e mulembe i kuma; Man mok m’amok ko cungo i wia, Etuco i wang’a.

⁹Eyeca i kwinyo pare, man esenda; Eng’enjo lake i kuma: Jasendna tono wang’e i kuma.

¹⁰Ging’amu dhoggi ira; Gipadu limba gicaya ko: Gicokri gigi karacelo i wia.

¹¹Mungu mia ni ju ma ayi Mungu mbe i kumgi, Man ebaya i cing’ judubo.

¹²Abedo yo, e etura ngik; Eyo, emaka ku ng’uta, man erwada nziki nziki: Eketha malu bende ni abotbot pare.

¹³Weg atum pare tieka gbur; Eyeca dra i piera, man kisa nege ngo i kuma; Ekonjo ulecu para i ng’om.

¹⁴Etura ku tur wi tur; Ering’ni i kuma calu jarukara,

¹⁵Akwoyo usuba wi dendkuma, Man aketho tung para i utur.

¹⁶Wang’a bogre ku ywak, Man tipo mi tho ni wi biendwang’a

¹⁷Kadok rop umbe i cinga, Man rwo para e leng’.

¹⁸A ng’om kud ium rimba, Man ywak para kud ubed ku kayom.

¹⁹Cil kawono, nen, jamulembe para ni i polo, Man ng’atu m’unyutho pira ni malu.

²⁰Jurimba gicaya: Ento wang’a eoro piwang’ ba Mungu,

²¹Ya ng’atu moko copo tito lembe pi dhanu ku Mungu, Calu wod dhanu tito pi jadhugola pare!

²²Kum ka rundi ma nok utundo, Abicidho ka m’abidwogo i ie ngo.