Read Alur Yob 18 Bible Online

Yob 18 - Alur bible

Yob 18

¹Bildad ma Jacuhi lund uloko lembe, man ewacu kumae,

²Wubiyenyo lembe rokani? Iwu pidi, man yo ku ng’eye e wabiweco.

³Pirang’o jukwanuwa calu yedi, Man wadoko ni gin m’ucido i weng’i?

⁴In m’iyeeri giri i ng’ecwiny peri, Jubikuno ng’om piri? Kadi jubidaku cana kud i kakare?

⁵Eyo, jubinego der pa jadubo, Man bieimac pare birieny ungo.

⁶Der bibedo col i hema pare, Man thala pare jubinego i wie.

⁷Jubicero dakutielo mi tego pare, Man lembapora pare gire biredhe piny,

⁸Kum juredhe i voi ni kum tiende gire, Man ewotho wi uwic m’ubedo apana.

⁹E kindu bimake i ufunytielo, E acuku bimake.

¹⁰Uwic pondo ire i ng’om, Man ngbak ire i yo.

¹¹Ndiri binyayu lworo i ie kun ku kun, Man gibirieme kum ufuny tiende.

¹²Kec binego tego pare, Man ru vwa bibedo ayika i ng’ete.

¹³Wathkum mi kume bithum, Eyo, kayu mi tho bicamu wathkume.

¹⁴Jubimuge woko kud i hema pare m’egeno; Man jubitere bang’ ubimo mi ndiri.

¹⁵Gin ma pare ngo bibedo i hema pare: Jubikonjo muganga wi kabedo pare.

¹⁶Jubitalu ulage ku piny, Man jubitong’o jange woko ku malu.

¹⁷Poi pare bijik kud i ng’om, Man ebibedo ku nying’ ungo i gengi.

¹⁸Jubirieme ku ba der i mudho, Man jubirieme woko kud i ng’om.

¹⁹Ebibedo ku wode kadi wod wode de ngo i kind dhanu pare, Kadi ng’atu moko de mbe ma dong’ i ka m’ebedo i ie.

²⁰Ju m’uwok cen igi biwang’ lii kum nindo pare, Calu ju m’ular uwok lworo negogi.

²¹Andha kabedo mi weg gondri bedo kumeno, Man maeni kaka ng’atu m’ung’eyo Mungu ngo.