Read Alur Yob 2 Bible Online

Yob 2 - Alur bible

Yob 2

¹Man etimbre kendo i ceng’ ma wot Mungu cidho thieri gigi i wang’ Yehova, nia Jok bende cidho i kindgi nithiere gire i wang’ Yehova.

²Man Yehova wacu ni Jok kumae, Iai kani? E Jok uloko lembe ni Yehova, man ewacu kumae, Aai wotho kun ku kun i ng’om, man aai wotho malu man piny i ie.

³E Yehova wacu ni Jok kumae, Ii pido pi jatic para ma Yobi? kum ng’atu moko mbe ma calu en i ng’om, ng’atu ma ndhu cu man atira, ng’atu ma lworo Mungu, man ma lokre cen ni dubo: e emoko asu kum bedocu pare, kadok ithuba kude, ketho anyothe ma lembene mbe.

⁴E Jok uloko lembe ni Yehova, man ewacu kumae, Dendkum ka wang’ dendkum, eyo, gin ceke ma dhanu bedo ko ebimio pi kwo pare.

⁵Ento riei cingi kawono, man imul cogone ku ring’kume, e ebicei i weng’i.

⁶Man Yehova wacu ni Jok kumae, Nen, eni i cingi; ento gwok kwo pare.

⁷Kum kumeno Jok uai woko kud i vut Yehova, man egoyo Yob ku vur ma rac ugambre i die tiende cik i die wie.

⁸Man egamu dekle kara egwenjre kudo: man ebedo i vuru.

⁹Dhaku pare lund uwacu ire kumae, Fodi imoko asu wi bedocu peri? wek Mungu, e itho.

¹⁰Ento ewacu ire kumae, Iweco calu kind mon ma jukusegu acel weco. Ang’o? wabijolo gin ma ber kud i cing’ Mungu, man wabijolo gin ma rac ungo? I maeni ceke Yob udubo ngo ku dendhoge.

¹¹Nie kinde ma jurimb Yob adek giwinjo pi lem ma rac maeni ceke m’uwok i kume, gibino kubang’gi kubang’gi ng’atuman kud i kakare ma dhe: Elifaz ma Jatemani, man Bildad ma Jacuhi, man Zofar ma Janamathi; e giripo lembe karacelo ya gibin giywage gijuke de.

¹²E kinde ma giting’o wang’gi malu ku bor cen, man ging’eye ngo, giting’o dwandgi malu, e giywak; man kubang’gi kubang’gi ng’atuman uyeco kanzu pare, e gikiro utur yor i polo i wigi.

¹³Kum kumeno gibedo piny karacelo kude i ng’om ceng’ abiro ku diewor abiro, e ng’atu moko mbe m’uweco lembe acel i bang’e: kum gineno nia can pare dit apila.