Read Alur Yob 20 Bible Online

Yob 20 - Alur bible

Yob 20

¹Zofar ma Janamathi lund uloko lembe, man ewacu kumae,

²Ka kumeno pidoie para mio ira lokolembe, En e ni kum rueni para ma ni i ia.

³Awinjo juk m’unyayu lewic i wia; Man tipo mi ng’eyong’ec para loko ira lembe.

⁴Ing’eyo maeni ngo ugambre coni, Ugambre ma juketho dhanu wi ng’om,

⁵Nia aloci mi judubo en e mi nindo ma noki, Man mutoro mi ju ma ayi Mungu mbe i kumgi en e mi nindo ma nyagwil kende?

⁶Kadok kadongone tundo malu i polo, Man wie tundo kum afuru;

⁷Ento ebirwinyo mi nja calu weyo pare gire: Ju m’unene biwacu kumae, Eni kani?

⁸Ebiringo calu lek, man ebinwangre ngo: Eyo, jubirieme woko calu ginmawokiwang’ mi diewor.

⁹Wang’ m’unene binene kendo ngo; Kadok kakare de binene kendo ngo.

¹⁰Nyithindho pare biyenyo bero ba jucan, Man cinge bidwoko lonyo pare.

¹¹Cogone pong’ kud aradu pare, Ento ebivuto piny karacelo kude i utur.

¹²Kadok dubo mit i dhoge, Kadok epane the lebe,

¹³Kadok ebani i wie, man eweko ngo ecidhi, Ento egwoke asu yor i dhoge;

¹⁴Ento cemo pare lokre yor i cindie, En e ulecu mi pino yor i ie.

¹⁵Emwonyo lonyo, man ebing’ogogi kendo; Mungu bibayugi woko kud i ie.

¹⁶Ebidhodho kwir mi pino: Leb urobi binege.

¹⁷Ebineno wi kulo ngo, Kulo ma mol mi kic ku mo.

¹⁸Gin m’emule i kume ku tic ebidwoke, ebimwonye de ngo; Calku piny m’elimo, anyong’a binege ngo.

¹⁹Kum esendo man ekuno jucan; Eyaku ot ku rop, m’egomo ngo.

²⁰Kum eng’eyo bedoyo ngo yor i ie, Ebikanu kum gin ma anyong’a nege i kume ngo.

²¹Gin moko mbe m’udong’ ma k’ecamu ngo; Ka kumeno mierolembe pare bibedo asu ngo.

²²I kind piny m’urome lem ma tek biwok i wie: Cing’ dhanu kubang’gi kubang’gi ma ni i can biwok i kume.

²³Kinde m’eceng’ni pong’o ie, Mungu biredho lak kwinyo pare i kume, Man ebikonje i wie kinde m’ebecamu.

²⁴Ebiringo jamtho mi nyunyu, Man atum mi mola bikile plu.

²⁵Ewodhe woko, man eai kud i kume; Eyo, dhoge m’urieny uai kud i ulecu pare: Ndiri make.

²⁶Mudho ceke jukanu malu ni piny m’akana pare: Mac ma dhanu kudho ngo biwang’e; Ebiwang’u gin m’udong’ i hema pare.

²⁷Polo binyutho kier pare, Man ng’om biai i wie.

²⁸Nyai mi ot pare biai; Piny pare birwinyo i nindo mi kwinyo pare.

²⁹Maeni en e makapiny pa jadubo ma ai ba Mungu, Man aba m’ukethre ire ni kum Mungu.