Read Alur Yob 21 Bible Online

Yob 21 - Alur bible

Yob 21

¹Yob ulund uloko lembe man ewacu kumae,

²Wuwinj wec para cu; Man wuwek maeni bed juk iwu.

³Wuyi ira, e an bende abiweco; Man yo ng’ei m’ayero, wucai asu.

⁴An, ywak para ni ba dhanu? Abedo m’atwio cwinya ngo nedi?

⁵Wunen bang’a, man iwu wang’ lii, Man wuketh cingwu wi dhogwu.

⁶Cil kinde m’apoi cwinya ng’abre, Man ndiri maku ring’kuma.

⁷Pirang’o judubo bedo kwo, Giti, eyo gidoko tek i tego?

⁸Kodhigi cungo karacelo kugi i wang’gi, Man nyikwaigi i nyim wang’gi.

⁹Udigi bedo museme ni lworo, Kadok dul pa Mungu de ni i wigi ngo.

¹⁰Thwon migi nyol, man erem ungo; Min dhiang’ migi nyol, man ie dubre ngo.

¹¹Gioro nyithindho migi ma thindho calu udul, Man nyithindho migi miel.

¹²Giwero wer kud umbukulumbu man adungu, Man anyong’a negogi kum badwal mir usegu.

¹³Gilalu nindo migi i mierolembe, Man i nindo ma nyagwil giloro piny i liel.

¹⁴Man giwacu ni Mungu kumae, Ai i kumwa; Kum wayenyo ng’eyong’ec mi yo peri ngo.

¹⁵Jategokpo en e ang’o, ma nia watim ire? Man wabikwanyu ang’o, tek warwo ire?

¹⁶Nen, mierolembe migi ni ceng’ni ngo: Lembapora mi judubo ni bor kuda.

¹⁷Thala mi judubo junego wang’ uduli? Ma nia ruvwa migi wok i wigi? Ma nia Mungu pok can i ng’ecwiny pare?

¹⁸Ma nia gi calu soka i wang’ yamu, Man calu cung’ ma wavuvu leko woko?

¹⁹Wuwacu kumae, Mungu kanu kier pare malu ni nyithindhe. Wek ecule ire gire, kara eng’eye:

²⁰Wek wang’e gire nen nyoth pare, Man wek emadh kum kwinyo pa Jategokpo.

²¹Kum epido pi ot pare yo ng’eye nenedi, Kinde ma wel dwi pare jiki?

²²Ng’atu moko biponjo Mungu ku ng’eyong’eci, Kum epoko lembe mi ju ma gini malu?

²³Ng’atu moko tho i tego pare ma pong’, M’ebedo ndhu yo man museme:

²⁴Agulu pare pong’ ku cak, Man mo mi cogone numu.

²⁵Man ng’atu mange tho i ulecu mi ng’eyong’ec, Ma fodi k’ebilo gin ma ber ungo.

²⁶Givuto piny cal acel i utur, Man ukoko umogi.

²⁷Nen, ang’eyo pidoie mu Man lembapora ma wuyenyo wutima ko rac.

²⁸Kum wuwacu kumae, Ot pa jaditmawijo ni kani? Man hema ma judubo bedo i ie ni kani?

²⁹Wupenjo dhanu ma juwoth ungo? Man wung’eyo lembanyutha migi ngo,

³⁰Nia jukanu jadubo ni ceng’ mi ruvwa? Nia jupeyogi woko ba ceng’ mi kwinyo?

³¹Ng’a ma biyero yo pare i wang’e? Ng’a ma biculo ire pi gin m’etimo?

³²Ento jubitere i liel, Man dhanu bikuro wi liende.

³³Lungu ulobo m’i poga bibedo mit ire. Man dhanu ceke bilubo ng’eye, Calu dhanu ma welgi kwandre ngo i wang’e.

³⁴Ka kumeno wujuka mananu nenedi, Ma nwang’u ndra kende m’udong’ i lokolembe mu e?