Read Alur Yob 22 Bible Online

Yob 22 - Alur bible

Yob 22

¹Elifaz ma Jatemani lund uloko lembe, man ewacu kumae,

²Dhanu copo bedo kuloka ni Mungu? Andha ng’atu ma riek en e kuloka ire gire.

³En e mutoro ni Jategokpo, nia in i pwe? Kadi en e kuloka ire, ya iketho yo peri ndhu cu?

⁴Ejuki kum lworo m’ilwore ko, Ya wumondo wukude i pokolembe?

⁵Dubo peri dit ungo? Kadok kajik mi kier peri de mbe.

⁶Kum igamu mukwatu p’umeru mananu, Man iwanyu kendi mi ju m’ubedo muneru.

⁷Imio pi ngo ni ng’atu m’uol umadhi, Man itwono ju ma kec unego gi ku kwen.

⁸Ento pi ng’atu ma jatego, en e won ng’om; Man ng’atu ma won yung, ebedo i ie.

⁹Ioro mon ma coggi tho cen mananu, Man juturo bot kic.

¹⁰Ka kumeno uwic utieki gbur, Man lworo ma pio ng’abu cwinyi,

¹¹Kadi mudho, kara kud inen piny, Man pi dupa umi.

¹²Mungu ni i usumbru polo ngo? Man nen wi cero, maram gini malu ko!

¹³Man iwacu kumae, Mungu ng’eyo ang’o? Ecopo poko lembe kud i mudho ma bii?

¹⁴Afuru ma col en e girauma ire, ketho nia eneno ngo; Man ewotho wi twod mi polo.

¹⁵Ibigwoko yo ma con Ma judubo nyono?

¹⁶Ma jumayu ma fodi nindo migi kutundo ngo, Ma thepiny migi jukonjo woko calu kulo,

¹⁷M’uwacu ni Mungu kumae, Ai kud i kumwa; Man, Jategokpo copo timo ang’o i kumwa?

¹⁸Ento epong’o udi migi ku gin ma ber: Ento lembapora mi judubo ni bor kuda.

¹⁹Ju ma pwe nene, e mutoro negogi; Man ju ma lembe mbe i wigi ging’ierogi hai,

²⁰Giwacu kumae, Andha ju m’uai malu i wiwa ging’ol, Man donge m’udong’ mac uwang’u.

²¹Kawono ng’i kude, man ibed ma cwinyi kwio: Kum kumeni bero bibino i beng’i.

²²Akwei, joi cik kud i dhoge, Man ikan lembe pare i cwinyi.

²³Tek idwogo ba Jategokpo, ibigombri, Tek icoro gondri bor cen kud i hema peri.

²⁴Man iketh piny m’akana peri i utur, Man mola ma kwar mir Ofir i kind kidi m’i kulo;

²⁵Man Jategokpo bibedo piny m’akana peri, Man mola ma tar ma pire tek iri.

²⁶Kum anyong’a bilund negi kum Jategokpo, Man ibiting’o weng’i malu ba Mungu.

²⁷Ibitimo rwo peri ire, man ebiwinji; Man ibiculo lembang’ola peri m’ing’olo.

²⁸E ibing’olo lembe bende, man ebicungo iri; Man der birieny wi yo peri.

²⁹Kinde ma giredhi piny, ibiwacu kumae, Ting’omalu nuti; Man ng’atu ma mol ebibodho.

³⁰Ebibodho cil ng’atu ma lembe mbe i wie ngo de: Eyo, ebiboth ni kum leng’ m’i cingi.