Read Alur Yob 23 Bible Online

Yob 23 - Alur bible

Yob 23

¹Yob ulund uloko lembe man ewacu kumae,

²Cil tin ywak para bedo mi jai: Goc para pek ma sagu cur para.

³A, maku ang’ei ka m’acopo nwang’ei ie mire! Kara abin cil ba kom pare mire!

⁴Kuno di aketho lembe para kakare i wang’e, Man apong’o dhoga ku lembaloka.

⁵Kuno di ang’eyo lembe m’ebiloko ira. Man kuno di ang’eyo gin m’ebiwacu ira.

⁶Kuno di eii kuda i dit mi tego pare? Ungo; ento kuno di ewinja.

⁷Kuca weg bedopwe copo poro lembe kude; Kum kumeno kuno di aboth mi nja ni japoklembe para.

⁸Nen, acidho i wang’a, ento eni kuca ngo; Man adok cen, ento acopo nene ngo;

⁹Yo ku cing’ ma yor acam, kinde m’ebetimo tic, ento acopo nene ngo; Epondo gire yo ku cing’ ma yor acwic, ketho enendre ira ngo.

¹⁰Ento eng’eyo yo m’akwanyu; Kinde m’emulo ia, abiwok woko calu mola ma kw’ar.

¹¹Tienda moko ki kum dakutielo pare; Agwoko yo pare, man alokra cen ungo.

¹²Adok cen ungo kum lembang’ola mi dendhoge; Akanu lembe mi dhoge ma sagu cemo ma kapara.

¹³Ento pidoie pare acel, man ng’a ma copo loke? Man gin ma ng’eyong’ec pare yenyo, etimo maeno.

¹⁴Kum etimo maeno ma juketho ira: Man wadi gin ma kumeni dupa ni kude.

¹⁵Ka kumeno adoko tipo i wang’e; Kinde ma ia pido, lworo nega i kume.

¹⁶Kum Mungu dwoko cwinya ng’ic, Man Jategokpo nyayu ndiri i ia;

¹⁷Kum jular jukaba woko ngo ni mudho, Kadok mudho ma bii de eumo ngo ni wang’a.