Read Alur Yob 27 Bible Online

Yob 27 - Alur bible

Yob 27

¹Man Yob uting’o lembabola pare i kendo, man ewacu kumae,

²Calu Mungu bedo kwo, m’ukabu ng’ol para woko, Man Jategokpo, m’udwoko ng’eyong’ec para kec,

³(Kum kwo para fodi ni dho yor i ia, Man tipo pa Mungu ni i odiuma);

⁴Andha dendhoga biyero gondri ngo, Kadok leba de biweco abombi ngo.

⁵Ebed bor kuda ya agony lembe m’i wiwu: Abicoro bedocu para cen ungo kud i kuma maram abitho ko.

⁶Amaku bedopwe para ki, man abiweko ecidho ngo: Adundena bicaya ngo ma fodi abedo kwo.

⁷Wek jadegina bed calu jadubo, Man wek ng’atu m’uai i wia bed calu won gondri.

⁸Kum genogen pa ng’atu ma ayi Mungu mbe i kume ang’o, kadok egamu ire kuloka, Kinde ma Mungu kabu ng’eyong’ec pare woko?

⁹Mungu biwinjo ywak pare, Kinde ma can uwok i kume?

¹⁰Anyong’a binege gire kum Jategokpo, Man ebilwong’o Mungu ku ba nindo ceke?

¹¹Abiponjowu pi cing’ Mungu; Maeno ma ni karacelo ku Jategokpo abimung’o ngo.

¹²Nen, wun ceke wunene giwu; Ka kumeno nedi wu doko ni gin mananu ma kpa?

¹³Maeni makapiny pa jadubo ku Mungu, Man musolu mi jusend, ma gijolo ba Jategokpo:

¹⁴Tek nyithindhe medre, en e mi palamularu; Man nyikwaye biyeng’ ungo ku kwen.

¹⁵Dong’ jupare m’udong’ jubiyiko i tho, Man mon pare ma coggi tho gibiywak ungo.

¹⁶Kadok ecoko mola ma tar calu utur, Man eyiko kendi calu ulobo;

¹⁷Ecopo yike, ento weg bedopwe bironye, Man ju ma lembe mbe i wigi bipoko mola ma tarne.

¹⁸Egomo ot pare calu abirbir, Man calu otbak ma jakur ugomo.

¹⁹Evuto piny m’elony, ento jubicoke ba kwaru mire ngo; Eyabu wang’e, e embe.

²⁰Ndiri rube calu pi; Wavuvu kwale ku diewor.

²¹Yamu ma yo nyangu tere cen, e eai; Man eyweye woko kud i kakare.

²²Kum Mungu bicanye, man kisa binege ngo: Kuno di epiei kud i cinge.

²³Dhanu biteng’o cing’gi ire, Man gibicwie kud i kakare.