Read Alur Yob 28 Bible Online

Yob 28 - Alur bible

Yob 28

¹Ka kuny mola ma tar nuti andha, Man ka ma juthiedho ie mola ma kwar.

²Jugamu nyunyu kud i ng’om, Man mola julenyo ku kum kidi.

³Dhanu ketho kajik mi mudho, Man eyenyo, cil kum kieu ma bor, Kidi m’upondo ma mi mudho ma bii.

⁴Ekunyo vur ma bor ku kabedo mi dhanu; Wi tielo wil pigi; Giliere bor ku dhanu, githore kun ku kun.

⁵Pi ng’om, kwen ai kud i ie; Elokre i there calu ku mac.

⁶Kidine en e ka kidi ma tek m’uluga, Man ebedo kud utur mi mola ma kwar.

⁷Winyo mir amaci moko mbe m’ung’eyo yo maeno, Kadok wang’ acur de nene ngo:

⁸Yedi mi kuhaya fod’unyone ngo, Kadi umvor ma kwiny de fod’ukadhu i ie ngo.

⁹Eketho cinge wi cana ma tek; Eng’ielo gudi kud ulage.

¹⁰Eng’enyo ora i kind cana; Wang’e neno gin ceke ma pire tek kubang’e kubang’e.

¹¹Etwio dhu kulo kara ku gimol; Man ewodho gin m’upondo i der.

¹²Ento jubinwang’u rieko kani? Man ka ng’eyo thelembe ni kani?

¹³Dhanu ng’eyo wel pinje ngo; Kadok i ng’om mi ju ma kwo de junwang’e ngo.

¹⁴Kut uwacu kumae, Umbe i ia; Man nam wacu kumae, Eni kuda ngo.

¹⁵Jucopo game ku mola ma kwar ungo, Kadok mola ma tar de juporo ngo pi wel pinje.

¹⁶Jucopo poro wel pinje ngo ku mola ma kwar mir Ofir, Ku kidi ma col calu nam ma pire tek, kadi ku kidi ma tek ma ie nen uluga.

¹⁷Mola ma kwar kadi kieu copo rome ngo, Kadok jamb ruko mi mola ma kwar ma leng’ de jubiloke ko ngo.

¹⁸Jubiweco ngo pi kidi ma tar ma the nam kadi pi kidi ma pire tek ma i upal. Eyo, welpiny mi rieko sagu kidi ma kwar ngbo.

¹⁹Kidi ma ie nen ma calu lum mir Ethiopia biromo kude ngo, Kadok ku mola ma kwar ma leng’ de jubiporo wel pinje ngo.

²⁰Ka kumeno rieko ai kani? Man ka ng’eyothelembe ni kani?

²¹M’ebedo aponda ni wang’ ju ma kwo ceke, Man agwoka de ni winyo m’i polo.

²²Nyoth ku Tho giwacu kumae, Wawinjo rwonglembene ku ithwa.

²³Mungu ng’eyo yoje, Man eng’eyo kakare.

²⁴Kum eneno dhu kajik mi ng’om, Man eneno the polo dho;

²⁵Kara etim pek mi yamu: Eyo, eporo pi ku mukero.

²⁶Kinde m’eng’olo lembe ni koth, Man yo ni lukoth mi morpolo;

²⁷Elund enene, man eyero pire; Eketho ecungo, eyo, man eyenye.

²⁸Man ewacu kumae ni dhanu, Nen, lworo Rwoth, en e rieko; Man weko dubo en e ng’eyothelembe.