Read Alur Yob 29 Bible Online

Yob 29 - Alur bible

Yob 29

¹E Yob uting’o lembabola pare kendo, man ewacu kumae,

²A, maku abed calu i dwi ma con, Calu i nindo ma Mungu kura i ie;

³Kinde ma thala pare rieny i wia, Man ku der pare awotho kud i mudho;

⁴Calu abedo i cek mi nindo para, Kinde ma lembapora pa Mungu ni wi hema para;

⁵Kinde ma Jategokpo fodi ni kuda, Man nyithindha gini i vuta;

⁶Kinde ma dakutielo para bedo alwoka ku mo dhiang’, Man cana konjo kulo mi mo ira!

⁷Kinde m’awok woko ba dhugang’ bang’ adhura, Kinde m’ayiko kom para i gengi

⁸Awobi ginena man gipondo, Man dhanu m’uti giai malu man gicungo;

⁹Judongwomawijo gicero wec, Man giketho cing’gi wi dhoggi;

¹⁰Jucero dwand weg yung, Man lebgi moko kum dandgi.

¹¹Kum kinde ma ith uwinja, elund emio mugisa ira; Man kinde ma wang’ unena, enyutho lembe ira:

¹²Kum abodho jucan m’uywak, Kic bende, ma ng’atu moko mbe m’ukonye.

¹³Mugisa pa ng’atu ma ceng’ni rwinyo bino i wia; Man aketho cwiny dhaku ma cware tho wer ni anyong’a.

¹⁴Aronyo bedopwe, e euma: Pokolembe para en e calu kanzu man giratwia mi wie.

¹⁵Abedo wang’ ni abinga, Man abedo tielo ni won abala.

¹⁶Abedo ni wego ni jacanpiny: Man lembe pa ng’atu m’ang’eyo ngo ayenyo.

¹⁷Man aturo lwokni pa won gondri, Man akabu amaci kud i lake.

¹⁸Alund awacu kumae, Abitho i uthac para, Man abimedo ceng’ para calu kwio:

¹⁹Ulaga lak ba pi, Man thoi vuto diewor soro wi janga:

²⁰Dwong’ para bedo nyen i ia, Man atum para doko nyen i cinga.

²¹Dhanu ciko ithgi i bang’a, man gikuro, Man giling’ ni lembapora para.

²²Yo ng’ei lembe para giweco kendo ngo; Man wec para ton i wigi.

²³Man gikura calu pi koth; Man ging’amu dhoggi lac calu ni koth a cen.

²⁴Avonjo i bang’gi, kinde ma genogen migi mbe; Man gibayu der mi wang’a piny ungo.

²⁵Anyutho yo migi, man abedo calu rwoth, Man abedo calu ubimo i kind njuru asikari, Calu ng’atu m’ujuko ju m’uywak.