Read Alur Yob 3 Bible Online

Yob 3 - Alur bible

Yob 3

¹Yo ng’ei maeni Yob ualu dhoge, man ekwong’o ceng’ pare.

²E Yob uloko lembe man ewacu kumae:

³Wek ceng’ ma junyola i ie rwiny, Ku diewor m’uwacu kumae, Jugamu ic pa nyathin ma nico.

⁴Wek ceng’ maeno bed ni mudho; Mungu kud uyenye, Kadok der de kud urieny i wie.

⁵Wek mudho ku tipo mi tho lwong’e ya migi; Wek afuru bed i wie; Wek gin ceke ma dwoko ceng’ col unyai ndiri i ie.

⁶Pi diewor maeno, wek mudho ma bi make: Anyong’a kud unege i kind ceng’ mi rundi; Kud emond i wel mi dwi.

⁷Nen, wek diewor maeno bed kende; Dwal mi mutoro kud umond i ie.

⁸Wek ju ma kwong’o kwong’ gikwong’e, M’ubedo ayika mi eewo nyang’.

⁹Wek cero mir uthienone bed col: Wek eki der, ento kud ebed kudo Kadok biendwang’ kugweno de kud enen:

¹⁰Kum eciko dhugola mi ii ma ngo, Kadi epanu can de ngo kud i wang’a.

¹¹Nedi atho ngo kud i ici? Nedi cwinya kadhu ngo kinde ma ma nyola?

¹²Nedi cong ujola? Kadi thuno de, ma nia adhothi?

¹³Kum kawono nwang’u avuto piny man abedo yo; Nwang’u anindo; nwang’u ayom,

¹⁴Karacelo ku ju m’ubimo ku juporlembe m’i ng’om, M’ugomo uvuru igi gigi;

¹⁵Kadi karacelo ku judongomawijo m’ubedo ku mola ma kwar. M’upong’o udi migi ku mola ma tar;

¹⁶Kadi calu ic m’udubre kuno di abedo mbe, Calu mukere ma fod’uneno der ungo.

¹⁷Kuca judubo weko dieng’ocwiny; Man kuca ju m’uol giyom,

¹⁸Kuca jukol gibedo yo karacelo; Giwinjo dwand jawitic ungo.

¹⁹Ju ma thindho ku ju ma dongo ni kuca: Man jatic ubedo agonya ni rwodhe.

²⁰Pir ang’o der umire ni ng’atu ma ni i ndiba, Man kwo ni ng’eyong’ec ma kec;

²¹M’ukuro tho, ento ewok ungo, Man m’ukunyo pire ma sagu pi piny m’akana m’upondo;

²²Man anyong’a negogi apila, Man mutoro negogi, kinde ma gicopo nwang’u lieli?

²³Nedi der umire ni ng’atu ma yo pare pandre, Man ma Mungu twode kud arara?

²⁴Kum gamucwiny para wok ma fodi acamu ngo, Man cur para konjre woko calu pi.

²⁵Kum gin m’alworo wok i kuma, Man maeno ma lworo nega i kume wok i kuma.

²⁶Abedo yo ngo, kadok ma cwinya kwio, kadok yom de abedo ko ngo; Ento can ucikubino abina.