Read Alur Yob 30 Bible Online

Yob 30 - Alur bible

Yob 30

¹Ento kawono ju ma rundi migi nok ma sagu para ging’iera, M’acayu ketho weggi karacelo ku gwogi mir udul rombe para.

²Eyo, tego mi cing’gi, copo bedo ni kuloka ira nenedi, Dhanu ma tego mi rundi migi rwinyo?

³Gimok kum canpiny man ndru; Ginang’u ng’om m’uthwo, i ka ma col ma kende man nyoth.

⁴Gifudho mutabi ku jange; Ulag uywic en e cemo migi.

⁵Juriemogi woko kud i kind dhanu; Gikok i tokgi calu tok jakwo;

⁶Ketho nia gibedo i longro ma nyayu ndiri, I ka ma thwolo mi ng’om man mi cana.

⁷Giywak i kind yen m’udinyo; Gicokri karacelo ther awu.

⁸Gi nyithindho mi jukusegu, eyo, nyithindho mi dhanu ma rac; Juriemogi woko kud i ng’om.

⁹E kawono adoko ni wer migi, Eyo, an a koi igi.

¹⁰Gidaga, gicungo cen i kuma, Gikwero ngo ya ging’ul lau i wang’a.

¹¹Kum egonyo thondhe, man esenda; Man gibayu jamtwiny mi kana i wang’a.

¹²Man dhanu ma sai giai malu yo ku cinga ma yor acwic; Gicoro tienda cen, Man gibolo yo migi mi nyoth i kuma.

¹³Ginyotho yo para, Ginyayu ruvwa para, En e dhanu ma jakony umbe.

¹⁴Gibino calu kud i ka m’utur ma lac: Gipiei i wia kud i ka m’umor.

¹⁵Ndiri lokre i kuma; Giriemo yung para calu yamu; Man bedober para kadhu cen calu afuru.

¹⁶Man kawono ng’eyong’ec para konjre woko yor i ia; Nindo mi can umaka.

¹⁷Jucobo cogona i ia i nindo mi diewor, Man remokum m’ukaya yom ungo.

¹⁸Kendi para lokre ku tego ma dit pa Mungu; Etwia gbur calu ng’ut kanzu para.

¹⁹Ebaya i codho, Man adoko calu utur man vuru.

²⁰Aywak i beng’i, man iloko ira lembe ngo: Acungo, e inena tel.

²¹Ilokri ni jarop ira; Isenda ku tego mi cingi.

²²Iting’a malu ba yamu, man iketho awotho i wie; Man iketho aloi i wavuvu.

²³Kum ang’eyo nia ibikela ba tho, Man ba ot ma juketho ni ju ma kwo ceke.

²⁴Ento ng’atu moko rieyo cinge ngo kan epodho? Kadi i ruvwa pare eywagu kony ungo?

²⁵Aywak ungo pi ng’atu ma ni i cani? Can unego ng’eyong’ec para ngo kum jucanpinyi?

²⁶Kinde m’akio gin ma ber, e lem ma rac ulund uwok; Man kinde m’akuro der, e mudho wok.

²⁷Cwinya ng’abre, man eyom ungo; Nindo mi masendi wok i kuma,

²⁸Acidho ku ywak m’umbe ceng’: Acungo i cokri, man aywagu kony.

²⁹An a umin Utho, Man wadi udo.

³⁰Dend kuma col, man epodho kud i kuma, Man cogona wang’ ku lietho.

³¹Ka kumeno adungu para lokre ni ywak, Man usegu para ni dwand ju m’uywak.