Read Alur Yob 31 Bible Online

Yob 31 - Alur bible

Yob 31

¹Atimo lembariba ku wang’a; Ka kumeno acopo neno nyaku ma sumba nenedi?

²Kum makapiny ang’o m’uai ba Mungu ma malu, Man musolu m’uai ba Jategokpo ma malu?

³En e ruvwa ngo ni weg gondri, Man mono ni jutim kieri?

⁴Eneno yo para ngo, Man ekwanu dakutielo para ceke ngo?

⁵Tek awotho ku ndra, Man tienda cidho pio bang’ abombi

⁶(Wek jupora i mukero ma rom rom, Kara Mungu ng’ei bedocu para);

⁷Tek dakutielo para lokre kud i yo, Man adundena lubo tok wang’a, Man tek poyo moko moko kum cinga:

⁸E wek acoi, man wek ng’atu mange cam; Eyo, wek jufudh giratwia mi podho para woko.

⁹Tek adundena bidhre kum dhaku moko, Man apondo dhugola pa jadhugola para;

¹⁰E wek dhaku para reg ni ng’atu mange, Man wek jumange riebri i wie.

¹¹Kum maeno en e lem ma rac dit; Eyo, en e kier ma maku jupoklembe gisend kume jo:

¹²Kum en e mac ma nyotho ni Nyoth, Man kuno di emugo nyai para ceke.

¹³Tek acayu lembe pa jamiru para, kadi pa bong’ para, Kinde ma waii wakugi;

¹⁴Abilund timo ang’o kinde ma Mungu ai malu? Mankinde m’eliewo, abiloko lembang’o ire?

¹⁵Ng’atu m’ucwia i ic ecwie ngo? Man ng’atu acel ung’inowa i ic ungo?

¹⁶Tek atwono jucan ku gin ma igi yenyo, Kadi acoro wang’ dhaku ma cware tho,

¹⁷Kadi tek acamu cemo para a kenda, Man kic ucamu kume moko ngo

¹⁸(Ungo, ugambre kum aradu para wadongo wakude calu ku wego, Man atelo wi nyaku ugambre kud i ma):

¹⁹Tek aneno ng’atu moko sendre kum can kendi, Kadi nia jucanpiny girauma mbe kugi;

²⁰Tek piere mio mugisa ira ngo, Man tek emuro kume ngo ku yuk rombe para;

²¹Tek ating’o cinga malu kum kic, Kum aneno jakonyna dhugang’:

²²E wek goka podh kud i cogo goka, Man bota tur kud i cogone.

²³Kum ruvwa m’uai ba Mungu en e ndiri ira, Man kum dwong’ pare acopo timo gin moko ngo.

²⁴Tek aketho mola ma kwar ni genogen para, Man tek awacu ni mola ma kwar ma leng’ kumae, In i genogen para;

²⁵Tek anyong’a nega kum naka piny para dit, Man kum cinga gamu dit;

²⁶Tek aneno ceng’ kinde m’erieny, Kadi dwi m’ubewotho ku rieny,

²⁷Man adundena bidhre ling’ ling’, Dhoga de cwio cinga:

²⁸Nwang’u maeni bende en e kier ma maku jupoklembe gisend kume jo; Kum nwang’u akwero Mungu ma ni malu.

²⁹Tek anyong’a nega kum nyoth pa ng’atu m’udaga, Kadi atingra gira malu kinde ma lem ma rac unwang’e

³⁰(Eyo, ayio ngo dhoga dubi Ku penjo kwo pare ku kwong’);

³¹Tek dhanu mi hema para wacu ngo kumae, Ng’a ma copo nwang’u ng’atu acel ma yeng’ ungo ku ring’o pare?

³²(Umondo vuto i gengi ngo; Ento ayabu dhugola para ni jawoth);

³³Tek calu Adamu aumo gondri para, Ku panu kier para i kora,

³⁴Kum alworo udul ma dit, Man cac mi juudi nyayu ndiri i ia, Ketho nia abedo ling’, man awok woko ngo kud i dhugola,

³⁵A tek abedo ku ng’atu acel m’uwinja mire! (Nen, giranyutha para eni, wek Jategokpo lok ira lembe) Man tek abedo ku kitabu ma jasendna goro mire!

³⁶Andha kuno di ayeye wi goka; Andha kuno di atwie i kuma calu jamkermiwic:

³⁷Kuno di ayero ire wel mi dakutielo para; Kuno di acoro ceng’ni i bang’e calu jaditmawijo.

³⁸Tek ng’om para ywak i kuma, Man lungu ng’om uywak karacelo;

³⁹Tek acamu nyinge m’umbe sente, Kadi aketho weggi tho:

⁴⁰Wek ucok utwi ka nganu, Man anyegomon ka nganu ma boco. Lembe pa Yob uthum.