Read Alur Yob 32 Bible Online

Yob 32 - Alur bible

Yob 32

¹Kum kumeno dhanu adek maeni giweko loko lembe ni Yob, kum en e pwe i wang’e gire.

²E kwinyo lund unego Elihu ma wod Barakel ma Jabuzi, mi juot pa Ram: kwinyo pare opo kum Yob, kum edwokre gire pwe ma sagu Mungu.

³Kwinyo pare opo kum jurimbe adek bende, kum ginwang’u lokolembe ngo, ento gigonjo Yob.

⁴Nwang’u Elihune kuro Yob ku lembe, kum joca gi judongo ire.

⁵Man kinde ma Elihu neno nia lokolembe mbe i dhu dhanu adek maeni, kwinyo pare opo.

⁶E Elihu ma wod Barakel ma Jabuzi loko lembe man ewacu kumae, An a nyathin, man wun wu judongo; Kum kumeno abedo cen, man alworo nyutho iwu lembapora para.

⁷Awacu kumae, Maku nindo weci, Man maku udul rundi ponj rieko.

⁸Ento tipo nuti i dhanu, Man yuyo pa Jategokpo mio igi ng’eyolembe.

⁹En e ju ma dwong’ ungo ma riek, Kadi judongo de ngo m’ung’eyo lem ma pwe.

¹⁰Ka kumeno awacu kumae, Wuwinja; An bende abinyutho lembapora para.

¹¹Nen, akuro lembe mu, Awinjo lembapora mu, Kinde ma wuyenyo gin ma wuyer.

¹²Eyo, awinjowu, Man, nen, ng’atu moko mbe m’uketho Yob uyi lembe, Kadi m’uloko wang’ lembe pare, i kindwu.

¹³Wubed ku weng’wu wumaru wacu kumae, Wanwang’u rieko; Mungu copo voye, dhanu ngo:

¹⁴Kum eketho lembe pare i kuma ngo; Kadok ku lembe mu de abiloko ire ngo.

¹⁵Igi wang’ lii, giloko lembe kendo ngo: Gimbe ku lembe ma giyer.

¹⁶Man abikuro, kum giweco ngo, Kum gicungo ling’, man giloko lembe kendo ngo?

¹⁷An bende abiloko maka para, An bende abinyutho lembapora para.

¹⁸Kum apong’ ku lembe; Tipo ma yor i ia dhula.

¹⁹Nen, kora calu pigulok ma kawokne mbe; Calu usaupigulok ma nyasa ebedo ayika mi kak.

²⁰Abiyero, kara cwinya kwi; Abialu dendhoga, man abiloko lembe.

²¹Akwayuwu, kud wuyi anen wang’ dhanu; Kadok nying’ mi pak mananu de abimio ngo ni ng’atu moko.

²²Kum ang’eyo mio nying’ mi pak mananu ngo; Tek atimo kumeno kuno di Jacwic para kaba woko pio.