Read Alur Yob 33 Bible Online

Yob 33 - Alur bible

Yob 33

¹Ento, Yob, akwei, winj lembayera para, Man icik ithi kum lembe para ceke.

²Nen kawono, aalu dhoga; Leba weco i dhoga.

³Lembe para biweco bedopwe mir adundena; Man gin ma dendhoga ng’eyo gibiweco ma abombi mbe.

⁴Tipo Mungu cwia, Man yuyo pa Jategokpo mio ira kwo.

⁵Tek icopo, lok ira lembe; Keth lembe peri kakare i wang’a, cung ngbeng’.

⁶Nen, an a jaba Mungu calu in: An bende jucwia kud ulobo.

⁷Nen, ndiri para binyayu lworo ii ngo, Kadok peklembe para de binuri ngo.

⁸Andha iyero i winjo para m’awinjo, Man awinjo dwand lembe peri, m’uwacu kumae,

⁹An a leng’, m’umbe gondri; Lembe mbe i wia, kadi kier de mbe i ia:

¹⁰Nen, enwang’u thelembe i wia, Ekwana ni jadegine:

¹¹Eketho tienda i kol, Eketho wang’e kum yo para ceke.

¹²Nen, abiloko iri lembe, i maeni in i pwe ngo; Kum Mungu dwong’ ma sagu dhanu.

¹³Nedi wuii wukude, Kum ewodho wel mi lembe pare moko ngo?

¹⁴Kum Mungu yero wang’ acel, Eyo wang’ ario, kadok dhanu ketho cwinye i kume ngo.

¹⁵I lek, i ginmawokiwang’ mi diewor, Kinde ma nindo ma pek upodho wi dhanu, Ku wang’ nindo wi kavuto;

¹⁶Elund eyabu ith dhanu, Man emwono ayi kum ponji migi.

¹⁷Kara ecer dhanu ni lembakece pare, Man epan kuhaya ni dhanu;

¹⁸Ecero ng’eyong’ec pare ni vur, Man kwo pare ni rwinyo ni kum palamularu.

¹⁹Juponje bende ku remokum wi kavuto pare, Man ku piem ma thiri thiri i cogone:

²⁰Ketho nia kwo pare dagu kwen, Man ng’eyong’ec pare cemo ma mit.

²¹Ring’kume thum woko, kara kud enen; Man cogone ma naka nen ungo nen.

²²Eyo, ng’eyong’ec pare coro ceng’ni vur, Man kwo pare ba junyoth.

²³Tek malaika ni kude, Jaloklembe, acel kind rubanga, Kara enyuth ni dhanu gin ma atira ire;

²⁴Mungu lund ubedo ku bero ire, man ewacu kumae, Bodhe kud elor piny i vur, Anwang’u war.

²⁵Ring’kume bibedo nyen ma sagu pa nyathin; Edwogo ba nindo mir aradu pare.

²⁶Erwo ba Mungu, e ebedo ku bero ire, Ketho nia eneno wang’e ku mutoro: Man edwoko bedopwe pare ni dhanu.

²⁷Ewero i wang’ dhanu, man ewacu kumae, Adubo, man aloko gin m’atira, Man eloko gin moko ira ngo:

²⁸Ewaru ng’eyong’ec para ku cidho i vur, Man kwo para bineno der.

²⁹Nen, gin maeni ceke Mungu timo, Wang’ ario, eyo wang’ adege, ku dhanu,

³⁰Kara edwok ng’eyong’ec pare kud i vur, Kara der ucare ku der mi ju ma kwo.

³¹Nen cu, E Yob, winj dwanda: Bed ling’, e abiweco.

³²Tek ibedo ku lembe mir aweca, lok ira lembe: Yer, kum ayenyo agony lembe m’i wii.

³³Tek ungo, winj dwanda: Bed ling’, e abiponji ku rieko.