Read Alur Yob 34 Bible Online

Yob 34 - Alur bible

Yob 34

¹Mange ke Elihu loko lembe man ewacu kumae,

²Wuwinj lembe para, wu dhanu ma riek; Man wucik ithwu i bang’a, wun ma wunuti ku ng’eyong’ec.

³Kum ith ponjo lembe, Calu dhok bilo cemo.

⁴Wek wafoi iwa gin m’atira: Wek wang’ei i kindwa giwa gin ma ber.

⁵Kum Yob uwacu kumae, An a pwe, Man Mungu kabu ng’ol para cen:

⁶Kadok ng’ol para nuti jukwana ni jandra; Lero para cangu ngo, kadok gondri para mbe.

⁷Ng’atu ma kani ma calu Yob, M’umadhu cac calu pi,

⁸M’uwotho karacelo ku jutim kier, Man m’uwotho ku dhanu ma raci?

⁹Kum ewacu kumae, Eloko gin moko ngo ni dhanu Ma nia anyong’a nege gire kum Mungu.

¹⁰Ka kumeno wuwinj dwanda, wu dhanu mi ng’eyothelembe: Ebed bor ni Mungu, nia etim dubo, Man ni Jategokpo, nia etim kier.

¹¹Kum ebiculo pi tic mi dhanu ni dhanune, Man ebiketho dhanu kubang’gi kubang’gi unwang’ calku yo migi.

¹²Eyo, andha, Mungu bitimo rac ungo, Kadi Jategokpo de biloko pokolembe ngo.

¹³Ng’a ma mio ire ng’ol wi ng’omi? Kadi ng’a ma ketho ng’om dho i wie?

¹⁴Tek eketho cwinye i kume gire, Tek ecoko tipone ku yuyo pare i bang’e gire;

¹⁵Kum ceke birwinyo karacelo, Man dhanu bidok kendo ni utur.

¹⁶Tek kawono ibedo ku ng’eyothelembe, winj maeni: Winj badwal mi lembe para.

¹⁷Ng’atu m’udagu pokolembe bibimo? Man ibigonjo ng’atu ma pwe ma jarukara?

¹⁸Ng’atu m’uwacu ni ubimo kumae, In i rac, Kadi ni weg yung kumae, Wun wu judubo;

¹⁹M’uneno wang’ judongomawijo ngo, Kadi m’uneno ba julonyo ngo ma sagu jucan; Kum gin ceke gi tic mi cinge.

²⁰I nindo ma nyagwil githo, en e ku diewor; Juyengo dhanu e gikadhu woko, Man jukabu jurukara cen m’umbe cing’.

²¹Kum wang’e ni wi yo mi dhanu, Man eneno yo pare ceke.

²²Mudho mbe, kadi tipo mi tho, Ka ma jutim kier copo pondo i ie.

²³Kum can pido pi dhanu nege hai ungo, Ma nia ecidh i wang’ Mungu i pokolembe.

²⁴Eturo dhanu ma jurukara nziki nzikii yo ma yenjre ngo, Man eketho jumange kakagi.

²⁵Ka kumeno eng’eyo tic migi; Man eng’ielogi ku diewor, ketho nia ginyothri.

²⁶Egoyogi calu dhanu ma rac I wang’ jumange ngbeng’;

²⁷Kum gilokri cen ku lubo ng’eye, Man gikwero paru pi yo pare moko:

²⁸Kum kumeno giketho ywak mi jucan ubino i bang’e, Man ewinjo ywak pa ng’atu ma jusendo.

²⁹Kinde m’emio yom, ng’a ke ma copo gonjo? Man kinde m’epanu wang’e, ng’a ke ma copo nene? Ceke acel tek etimbre ni thek, kadi ni dhanu:

³⁰Kara ng’atu ma ayi Mungu mbe i kume kud ucam ker, Kara ng’atu moko kud ubed nuti m’umak dhanu kud uwic.

³¹Kum ng’atu moko wacu ni Mungu kumae, Jusenda, abidubo kendo ngo:

³²Ponja ku gin m’aneno ngo: Tek atimo kier, abitime kendo ngo?

³³Culokwor pare bibedo calu iyenyo, ma nia ikwere? Kum maku ifoi, an re ngo: Ka kumeno yer gin m’ing’eyo.

³⁴Dhanu mi ng’eyothelembe biwacu ira kumae, Eyo, ku ba dhanu ceke ma riek m’uwinja:

³⁵Yob uyero ma ng’eyong’ec umbe, Man lembe pare bedo ma rieko mbe.

³⁶Maku jumul i Yob cil i kajik, Kum lokolembe pare calu judubo.

³⁷Kum emedo jai kum dubo pare; Eteng’o cinge i kindwa, Man emedo lembe pare kum Mungu.