Read Alur Yob 35 Bible Online

Yob 35 - Alur bible

Yob 35

¹Mange ke Elihu loko lembe man ewacu kumae,

²Iparu nia maeni ng’ol peri, Kadi iwacu kumae, Bedopwe para sagu pa Mungu,

³Ketho iwacu kumae, Ebibedo ni kuloka ang’o iri? Man, Kuloka ang’o m’abibedo ko, ma sagu ma tek adubo?

⁴Abiloko iri lembe, Man ni juwedu karacelo kudi.

⁵Wunen yor i polo, man wung’i; Man wunen afuru, ma ni malu ma sagu in.

⁶Tek idubo, itimo ang’o i kume? Man tek gondri peri medre, itimo ang’o ire?

⁷Tek ibedo pwe, imio ang’o ire? Kadi ejolo ang’o kud i cingi?

⁸Dubo peri copo timo dhanu rac calu in; Man bedopwe peri copo bedo ni kuloka ni wod dhanu.

⁹Kum udul mi masendi giywak; Giywagu kony ni kum bot jurukara.

¹⁰Ento ng’atu moko wacu kumae ngo, Mungu ma Jacwicna ni kani, M’umio wer ku diewor,

¹¹M’uponjowa ma sagu yedi m’i ng’om, Man m’udwokowa riek ma sagu winyo m’i polo?

¹²Giywak kuca, ento ng’atu moko mbe m’uloko lembe, Kum kuhaya mi dhanu ma rac.

¹³Andha Mungu biwinjo ywak ma ie nanu ngo, Kadok Jategokpo de biparu pire ngo.

¹⁴E ka kinde m’iwacu ibenene ngo ke nenedi, Lembe ni i wang’e, man ikure!

¹⁵Ento kawono, kum eliewo i ng’ecwiny pare ngo, Kadok eparu pi pekwic hai ungo;

¹⁶Ka kumeno Yob uyabu dhoge i lem ma ie nanu; Emedo lembe ma ng’eyong’ec umbe.