Read Alur Yob 37 Bible Online

Yob 37 - Alur bible

Yob 37

¹Eyo, kum maeni adundena miel, Man edak kud i kakare.

²Winj, a, winj ba dwande, Man ba dwal m’uwok woko kud i dhoge.

³Eore woko the polo dho, Man lukoth pare ba kajik mi ng’om.

⁴Yo ku ng’eye dwal urundo; Emor ku dwal mi dwong’ pare; Kinde ma dwande winjre ecero lukoth ungo.

⁵Mungu mor ma wang’u ijo ku dwande; Etimo gin ma dit, ma wacopo ng’eyo ngo.

⁶Kum ewacu ni pei kumae, Podh wi ng’om; Man ni pikoth mi koth de kumeca, Man ni pikoth mi koth pare ma tek.

⁷Emwono wi cing’ dhanu ceke kubang’gi kubang’gi, Kara dhanu ceke m’ecwio ng’ei maeni.

⁸Yedi lund umondo i kapondo, Man gidong’ i odgi.

⁹Wavuvu ai kud i kusika ma yor ariwa ma piny, Man koyo ai yor ariwa ma malu.

¹⁰Ku yuyo pa Mungu pei mire; Man kalac mi pi dupa moko.

¹¹Eyo, eketho ter mi pi wi afuru ma pek; Epedho afuru mi lukoth pare foo:

¹²Man elokre kun ku kun ku twiny pare, Kara gitim gin ceke ma tek eng’olo igi Wi wang’ ng’om ma dhanu ni i ie;

¹³Kadok ebedo mi juk, kadi mi ng’om pare, Kadi mi kisa, ya ekele.

¹⁴E Yob, winj maeni: Cung ling’, man ii pid pi tic pa Mungu ma wang’u ijo.

¹⁵Ing’eyo maram Mungu ketho ko kur pare i wigi, Man maram eketho ko lukoth mir afuru pare rienyi?

¹⁶Ing’eyo por mir afufu, Tic ma wang’u ijo pa ng’atu m’ubedo ndhu cu i ng’eyong’eci?

¹⁷Maram kendi peri mor ko, Kinde ma ng’om ucungo ling’ ni kum yamu ma yor ariwa ma pinyi?

¹⁸Wucopo pedho polo wukude, M’e tek calu kieu m’atwaga?

¹⁹Ponjwa ku gin ma wabiyero ire; Kum wacopo ketho wec mwa cung kakare ngo ni kum mudho.

²⁰Jubiyero ire nia ayenyo aweci? Kadi maku dhanu yeny nia jumwonye?

²¹E kawono dhanu neno der ungo ma rieny i polo; Ento yamu kadhu, man elonyogi.

²²Rieny mi mola ma kwar ai ku yor ariwa ma malu: Mungu ronyo dwong’ mi ndiri.

²³Pi Jategokpo, wacopo nwang’e ngo: E dwong’ i tego; Man i pokolembe ku bedopwe ma dupa ebisendo ngo.

²⁴Ka kumeno dhanu lwore: Eparu pi ng’atu moko ngo ma riek i adunde.