Read Alur Yob 38 Bible Online

Yob 38 - Alur bible

Yob 38

¹Yehova lund uloko lembe ni Yob kud i wavuvu, man ewacu kumae,

²Maeni ng’a m’uyutho lembapora Ku lembe ma ng’eyong’ec umbe?

³Kawono twi pieri calu dhanu; Kum abiyenyo i beng’i, e iyer ira.

⁴Ini kani kinde m’aketho the ng’omi? Yer, tek ibedo ku ng’eyothelembe.

⁵Ng’a m’uketho porne, tek ing’eyo? Kadi ng’a m’urieyo thol i wie?

⁶Jutwio there wi ang’o? Kadi ng’a m’uketho kidi mi gunde,

⁷Kinde ma cero mi kugweno wero karacelo, Man wot Mungu ceke woi ni mutoro?

⁸Kadi ng’a m’uciko ba nam ku dhugola, Kinde m’eng’enyo piny m’ewok ko woko, calu eai kud i ie;

⁹Kinde m’atimo afuru ni kendi pare, Man mudho ma bii ni kendi m’auma pare,

¹⁰Man aporo kieu para pire, Man aketho utwindi ku dhugola,

¹¹Man awacu kumae, Ibibino kae, ento kudikadhi; E mukura peri mi kuhaya bijik kae?

¹²Ing’olo ni kugweno ugambre i thekri mi nindo peri, Man iketho rupiny ung’ei kakare;

¹³Kara emak tung’ ng’om, Man judubo yengri woko kud i ie?

¹⁴Elokre calu ulobo ther ayi; Man gin ceke cungo calu kendi:

¹⁵Man der migi cere ni judubo, Man bot ma malu tur.

¹⁶Imondo i kulo mi nami? Kadi iwotho i kapondo mi ka ma thuthi?

¹⁷Dhugang’ mi tho yabre iri? Kadi ineno dhugang’ mi tipopiny mi tho?

¹⁸Ing’eyo ng’om i kalacne? Yer, tek ing’eyo maeni ceke.

¹⁹Yo ma tundo i kabedo mi der ni kani? Man pi mudho, kakare ni kani,

²⁰Ma nia itere i kieune, Ma nia ing’i yo ma tundo i ode?

²¹Kuno nyo, ing’eyo, kum junyoli i nindo maeca, Man wel nindo peri dit!

²²Imondo i kakan koth m’umakre, Kadi ineno kakan pei,

²³M’agwoko kum nindo mi can, Kum nindo mi lwiny, man ali?

²⁴Der upokre ku yo kani, Kadi ma yamu ma yo nyangu lal ko wi ng’omi?

²⁵Ng’a m’ung’enyo ora mi pi ma core, Kadi yo ni lukoth mi morpolo;

²⁶M’uketho koth ucwi i ng’om ma dhanu mbe i ie; I langa, ma dhanu mbe i ie;

²⁷Kara ukwi ng’om ngele ma kende, Man ulodh lum ma numu?

²⁸Koth won nuti? Kadi ng’a m’unyolo thoi ma toni?

²⁹Pei ai kud i ng’a? Man thoi m’i polo ma makre, ng’a m’unyole?

³⁰Pi pondo gire man edoko calu kidi, Man wang’ pi ma thuth umakre.

³¹Icopo twio udul Yung’ni, Kadi icopo gonyo giratwia mir Ukwaidhoki?

³²Icopo telo wi Nyakaluku i nindone? Kadi icopo twio wi Uluthkwen ku yibe?

³³Ing’eyo lembapoka m’i polo? Icopo ketho bimne cungo i ng’omi?

³⁴Icopo ting’o dwendi malu bang’ afuru, Kara pi dupa umi?

³⁵Icopo oro lukoth, kara gicidhi, Man giwac iri kumae, Wani keni?

³⁶Ng’a ma ketho rieko i ici? Kadi ma mio ng’eyothelembe ni pidoici?

³⁷Ng’a ma copo kwanu wel mir afuru ku rieko? Kadi ng’a ma copo konjo cupa m’i polo,

³⁸Kinde m’utur ung’indre, Man lungu utur umoko ki karacelo?

³⁹Icopo dwaru ayeki ni min umvor, Kadi kwio kec mi nyithindh umvor,

⁴⁰Kinde ma gipondo i odgi, Man gibedo i kapondo kara gikan adhi?

⁴¹Ng’a m’uketho ayeki ni upa, Kinde ma nyithindhe ywak ba Mungu, Man giwiri kum cemo m’umbe?