Read Alur Yob 39 Bible Online

Yob 39 - Alur bible

Yob 39

¹Ing’eyo nindo ma diegi mi cana nyol i ie; Kadi icopo yero pi nindo ma nyajwaya nyol i ie?

²Icopo kwanu wel dwi migi m’uromo kakare? Kadi ing’eyo nindo ma ginyol i ie?

³Gigung’ gigi, giwodho nyithindhgi, Gibayu jemokum migi.

⁴Nyithindhgi doko tek, gidongo i thim ma sai; Gicidho, e gidwogo kendo ngo.

⁵Ng’a ma ofo kana m’i thim agonya? Kadi ng’a ma gonyo twic mi kana mi ng’wec,

⁶Ma ketho langa ni thugi, Man ng’om kadu ni kabedo pare?

⁷Ecayu yakni mir adhura, Kadok kok pa jalek de ewinjo ngo.

⁸Ng’et gudi en e kakwac pare, Man eyenyo gin ceke ma numu kubang’e kubang’e.

⁹Koni dhiang’ m’i thim biyio timo iri? Kadi ebibedo ng’et dero peri?

¹⁰Icopo twio koni dhiang’ m’i thim ku uno pare i thuth ng’omi? Kadi ebifuro poga yo ng’ei?

¹¹Ibigene, kum tego parediti? Kadi ibiweko tic peri i bang’e?

¹²Ibigene, nia ebikelo kodhi peri i ot, Man ebicoko cemo mi lelacam peri?

¹³Bomb udo piedhre ku kuhaya; Ento gi bomb ku yuk mi meri?

¹⁴Kum eweko tonge wi ng’om, Man emurogi i utur,

¹⁵Man wie wil nia tielo copo nyonogi, Kadi nia yedi m’i thim copo nyonogi.

¹⁶Etimo tek kum nyithindhe, calu ma tek gi pare ngo: Kadok tic pare bedo mananu, lworo nege ngo;

¹⁷Kum Mungu rwinyo ku rieko pare, Kadok ng’eyothelembe de emio ire ngo.

¹⁸Kinde m’etingre gire malu, Ecayu riuni ku ng’atu m’uidho i wie.

¹⁹Imio tego ni riuni? Ironyo ng’ute ku mujuga ma yengre?

²⁰Iketho epor calu bonyo? Dwong’ mi ywak pare en e mi ndiri.

²¹Egweyo piny i poga, man anyong’a nege kum tego pare: Ewok woko kara eromb ku weg jamtho.

²²Ecayu lworo, man cwinye ng’abre ngo; Kadok ni palamularu de elokre cen ungo.

²³Tubu yengre i kume, Ku tong’ ma rieny man ungutu tong’.

²⁴Emwonyo ng’om ku lak kwinyo; Kadok dwand agwara de eyio ngo.

²⁵Ku ba dwand agwara ma winjre ewacu kumae, Aha! Man eng’wio lwiny ku bor, Mor mi jego, ku kok.

²⁶Abiba ringo ni kum rieko peri, Man erieyo bombe yor ariwa ma pinyi?

²⁷En e ni kum lembang’ola peri ma acur idho ko malu, Man etimo uthac pare ku malu?

²⁸Ebedo wi umcana, man etimo ode, Wi bithcana, man ka ma tek.

²⁹Eneno amaci ku kuca; Wang’e nene ku bor.

³⁰Nyithindhe bende madhu rimo: Man ebedo i ka ma ju ma junego ni i ie.