Read Alur Yob 4 Bible Online

Yob 4 - Alur bible

Yob 4

¹Elifaz ma Jatemani lund uloko lembe, man ewacu kumae,

²Tek ng’atu moko ponjo weco kudi, can binegi? Ento ng’a ma copo cere gire ya kud eweci?

³Nen, iponjo dhanu dupa, Man imio tego ni cing’ ma ng’ic.

⁴Lembe peri jengo ng’atu m’ubepodho, Man idwoko cong’ ma ng’ic tek.

⁵Ento kawono ewok i kumi, e ivoc: Emulo kumi, e can unegi.

⁶Lworo Mungu peri en e genogen peri ngo, Man bedocu mi yo peri en e genogen peri ngo?

⁷Poi, akwei, ng’a ma fod’urwinyo, ma lembe mbe i wie? Kadi ju m’atira moko de jukabu woko kani?

⁸Calu m’aneno, ju ma furo kier, Man ma coyo can, e gikayu eca.

⁹Girwinyo ni kum yuyo pa Mungu, E githum ku koto mi ng’ecwiny pare.

¹⁰Rundo mir umvor, ku dwand umvor ma kwiny, Ku lak nyithindh umvor, utur.

¹¹Umvor m’uti rwinyo kum ayeki mbe, Man nyithindho pa meg umvor ulal mba.

¹²Nie jukelo gin moko i bang’a mung’ mung’, E itha jolo wecne ma mung’ mung’.

¹³I pidoic m’uai i ginmawokiwang’ ku diewor, Kinde ma nindo ma pek upodho wi dhanu,

¹⁴Lworo maka, ku mielkum, M’uketho cogona ceke yengre.

¹⁵E tipo moko lund ukadhu i nyim wang’a; Yukkuma dinyo,

¹⁶Ecungo ling’, ento acopo ng’io nenne ngo; Ayi ni i nyim wang’a: Piny uling’ ti, man awinjo dwal, uwacu kumae,

¹⁷Dhanu ma tho bibedo pwe ma sagu Mungu? Dhanu bibedo leng’ ma sagu Jacwicne?

¹⁸Nen, eketho genogen ungo kum jutic pare; Man eketho lembe wi malaika pare;

¹⁹Ju m’ubedo i udi mir ulobo sagu dit mire, Ma thepiny migi ni i utur, Ma junyonogi calu abirbir.

²⁰I kind kugweno kud uthieno ginyothri: Girwinyo i rwiny mi nja ma ng’atu moko mbe m’unene.

²¹Jufudho thondh hema migi ku yor i igi ngo? Githo, man ma rieko mbe.